• e hënë, 17 qershor 2024

Parlamenti hungarez e ratifikoi kandidaturën e Suedisë për NATO

Parlamenti hungarez e ratifikoi kandidaturën e Suedisë për NATO

Budapest, 26 shkurt 2024 (MIA) - Parlamenti i Hungarisë e ka miratuar sot projektligjin që i mundëson Suedisë anëtarësimin në NATO.

Hungaria ka qenë vendi i vetëm prej 31 vendeve anëtare të NATO-s që e ka bllokuar anëtarësimin e këtij vendi nordik në aleancën veriatlantike.

Ligjvënësit kanë votuar me 188 vota për dhe gjashtë kundër.

Disa ditë para votimit, kryeministri suedez, Ulf Kristerson ka qëndruar për vizitë në Budapest dhe bashkë me homologun e tij hungarez, Viktor Orban, e kanë nënshkruar një marrëveshje për armët.

Qeveria e Orbanit është përballur me presion prej aleatëve të NATO-s që të jetë në përputhje me vendet tjera të aleancës dhe të ratifikojë marrëveshjen për pranim të Suedisë.

“Më në fund është kryer, Suedia është anëtarja e 32-të e aleancës, dhe në këtë mënyrë NATO-ja është bërë më e fortë”, ka thënë Agnes Vadai, ligjvënëse e partisë opozitare hungareze, Koalicioni demokratik.

Stokholmi ka hequr dorë prej politikës së saj me gjenerata dhe ka vendosur t’i bashkohet NATO-s, para nisjes së luftës së Rusisë në Ukrainë, më 2022.

Suedia dhe Finlanda e kanë marrë vendimin e njëjtë, mirëpo Finlanda është anëtarësuar vitin e kaluar.

Suedinë e kanë vonuar Turqia dhe Hungaria, të cilat kanë marrëdhënie më të mira me Rusinë, sesa vendet tjera të NATO-s.

Turqia e ka bllokuar anëtarësimin e Suedisë, duke kërkuar më shumë masa të Stokholmit ndaj militantëve të Partisë Popullore të Kurdistanit (PKK), të cilët Ankaraja beson se strehohen në Suedi.

Hungaria e ka zvarritur procesin kryesisht për shkak të kritikave të Suedisë për nivelin e demokracisë në Hungari, nën udhëheqësinë e Orbanit.

Anëtarësimi i Suedisë, vend që nuk ka qenë në luftë prej vitit 1814, dhe Finlandës, përbën zgjerimin më të madh të aleancës, prej viteve të 90-ta.

Ndonëse Suedia ka bashkëpunuar me vendet e NATO-s, dhe ka kontribuuar në disa operacione, sikurse ato në Afganistan, anëtarësimi i saj pritet të thjeshtësojë planet për mbrojtje dhe bashkëpunimin në flotën veriore të NATO-s. mb/

QËNDRONI TË LIDHUR