Paris, 11 mars 2025 (MIA) - Presidenti francez Emanuel Makron do të presë sot në Paris shefat e Shtatmadhorive të vendeve që janë të gatshme të marrin përgjegjësinë për Ukrainën dhe të forcojnë sigurinë evropiane.

Midis pjesëmarrësve janë përfaqësues ushtarakë nga 30 vende të BE-së dhe/ose NATO-s, duke përfshirë Mbretërinë e Bashkuar dhe Turqinë. Takimi do të mbahet në koordinim të ngushtë me komandën ushtarake të NATO-s.

Pas takimit të sotëm, të mërkurën, ministri francez i Forcave të Armatosura Sebastien Lekornu do të mbledhë kolegët e tij nga grupi E5 - Franca, Gjermania, Mbretëria e Bashkuar, Italia dhe Polonia - si dhe përfaqësues të BE-së dhe NATO-s. Në takimin me video-konferencë do të marrë pjesë edhe ministri ukrainas i Mbrojtjes. Bisedimet kanë të bëjnë  me ndihmën për Ukrainën dhe riarmatimin e Evropës.

Vendet e BE-së i kanë dhënë tashmë dritën jeshile planit, i cili synon të mobilizojë deri në 800 miliardë euro gjatë katër viteve për të forcuar mbrojtjen e kontinentit dhe për të ndihmuar Ukrainën.

Të premten, Makron do të mbledhë gjithashtu industrialistët francezë të mbrojtjes, të cilëve u është kërkuar të përshpejtojnë ritmin e tyre që nga fillimi i pushtimit rus të Ukrainës dhe që tani duhet të përgatiten për dërgesa të reja.

Siç raportojnë agjencitë e huaja, qeveria do të duhet gjithashtu të bindë parlamentarët francezë në një kohë të financave të shtrënguara shtetërore se Francës do t'i duhet të ndajë 100 miliardë euro për mbrojtjen në vit në vend të 50 miliardë eurove. sa/

Foto: Arkivi i MIA-s