3 shtator 2025

BBC - Londër

Paneli i Kongresit Amerikan ka publikuar një mori dokumentesh që lidhen me hetimin federal ndaj autorit të ndjerë të krimit seksual Xhefri Epstajnit.

Komiteti Mbikëqyrës i Dhomës së Përfaqësuesve publikoi 33,295 faqe, duke përfshirë regjistrat e fluturimeve, videot e mbikëqyrjes së burgjeve, dosjet gjyqësore, regjistrimet audio dhe emailet.

Por si republikanët ashtu edhe demokratët thanë se dokumentet përmbanin pak informacione të reja dhe nuk ishte e qartë nëse Departamenti i Drejtësisë kishte të dhëna të tjera rreth Epstajnit.

Presioni është rritur nga mbështetësit e presidentit Donald Tramp për transparencë më të madhe në hetimin ndaj financierit me lidhje të mira, pasi Departamenti i Drejtësisë tha në korrik se nuk kishte një listë "kompromentuese" të klientëve të Epstajnit.

Kryetari i Komitetit Mbikëqyrës, republikani Xhejms Komer, urdhëroi që dokumentet të publikoheshin në internet dje. Paneli i udhëhequr nga republikanët i mori dokumentet pasi lëshoi një thirrje gjyqësore për Departamentin e Drejtësisë muajin e kaluar.

Por Komer, kongresmeni i Kentakit, pranoi se kishte pak informacione të reja. “Për aq sa mund të shoh unë, nuk ka asgjë të re në dokumente”, tha ai për En-Bi-Si Njuz.

Videot e publikuara mbrëmë përfshijnë pamje nga jashtë qelisë së burgut të Epstajnit në Nju-Jork Siti natën e vdekjes së tij. Ato përfshijnë 13 orë e 41 sekonda pamje nga objekti, që mbulojnë mbrëmjen e 9 gushtit deri në mëngjesin e 10 gushtit të vitit 2019, kur Epstajni ndërroi jetë. Kjo është një video që zgjat më shumë se dy orë, krahasuar me videon e publikuar dy muaj më parë nga Departamenti i Drejtësisë.

Por pamjet e publikuara rishtazi nuk përfshijnë të ashtuquajturin “moment të humbur” - një kalim në kodin kohor midis orës 23:00 dhe 00:00, sipas partnerit amerikan të Bi-Bi-Si-së, Si-Bi-Es.

Kryeprokurorja Pam Bondi më parë tha se “momenti i humbur” ishte thjesht një rivendosje e përditshme e sistemit të kamerave të burgut.

Megjithatë, anomalia e dukshme ka nxitur teori konspirative rreth përfundimit zyrtar se Epstajnit bëri vetëvrasje.

Pedofili i dënuar dikur shoqërohej me figura të njohura si Tramp, ish-Presidentin Bill Klinton dhe Princin e Britanisë, Endru.

Pakoja e dokumenteve përfshin gjithashtu disa klipe nga viti 2006 që tregojnë intervista me njerëz që pretendojnë se kanë qenë viktima të Epstajnit. Fytyrat e tyre janë të turbullta dhe emrat e tyre janë hequr nga audioja ndërsa flasin për abuzim seksual të dyshuar ndërsa ishin angazhuar për bërjen e masazheve.

Video të tjera tregojnë pamje nga kamerat policore në Palm Biç, Florida, duke kontrolluar një shtëpi në pronësi të Epstajnit.

Disa nga dokumentet datojnë 20 vjet më parë, duke mbuluar hetimin fillestar penal ndaj Epstajnit nga policia e Palm Biçit.

Por Robert Garcia, demokrati më i lartë në Komitetin Mbikëqyrës, tha: "Apel për popullin amerikan - mos u mashtroni”.

"Pas një shqyrtimi të kujdesshëm, demokratët në Komitetin Mbikëqyrës përcaktuan se 97% e dokumenteve të marra nga Departamenti i Drejtësisë ishin tashmë publike. "Nuk përmendet ndonjë listë klientësh apo ndonjë gjë që përmirëson transparencën ose drejtësinë për viktimat."

Kongresmenja demokrate Samer Li tha se "zbulimi i vetëm i ri" ishin ditarët verore të mbledhur nga Dogana dhe Mbrojtja Kufitare e SHBA-së, të cilët tregojnë udhëtimet e Epstajnit për në ishullin e tij dhe nga ishulli i tij privat në Ishujt e Virgjër të SHBA-së.

Publikimi erdhi pasi republikani rebel Tomas Masi vazhdoi një përpjekje dypartiake dje për të detyruar Dhomën e Përfaqësuesve të votonte për një projektligj që i kërkon Departamentit të Drejtësisë të publikojë të gjitha dokumentet e tij mbi Epstajnin brenda 30 ditëve.

Kongresmeni i Kentukit tha: "Njerëzit duan që këto dokumente të publikohen. Dua të them, nuk është problemi më i madh në vend. Janë taksat, vendet e punës, ekonomia, këto janë gjithmonë problemet e mëdha. Por nuk mund t'i zgjidhësh vërtet asnjë nga këto nëse ky vend është i korruptuar."

Dje, Kryetari i Dhomës së Përfaqësuesve, republikani Majk Xhonson, dhe anëtarët e Komitetit Mbikëqyrës u takuan me dyer të mbyllura, me gjashtë nga viktimat e Epstajnit.

Xhonson, një aleat i Trampit, u tha gazetarëve më pas se "në dhomë shpërthyen lot" ndërsa dëgjonin viktimat e Epstajnit.

Përfaqësuesja Nensi Mejs, republikane nga Karolina e Jugut, u pa se doli nga takimi duke qarë.

Demokratja Melania Stensberi vlerësoi të mbijetuarit për dhënien e mendimit dhe e përshkroi rastin si një "mbulim me përmasa epike".

Ligjvënësit dhe viktimat e Epstajnit planifikojnë të mbajnë një konferencë për shtyp në Kapitol Hill.

Foto: Arkivi i EPA-s