Islamabad, 26 gusht 2025 (MIA) - Pakistani ka evakuuar të paktën 150,000 njerëz në zonat përgjatë tre lumenjve në pjesën bujqësore të vendit për shkak të kërcënimit të përmbytjeve, pasi India fqinje paralajmëroi se planifikon të lëshojë ujë të tepërt nga një prej digave të saj, thanë sot zyrtarët.

India dhe Pakistani janë goditur nga shira të dendur dhe përmbytje në javët e fundit.

Lëshimi i ujit të tepërt kërcënon të përmbytë më tej pjesë të provincës Penxhab të Pakistanit, e cila shërben si shporta e bukës së vendit dhe përbën një pjesë të madhe të furnizimit të saj me ushqim.

Vendet e armatosura me armë bërthamore kanë qenë në një përplasje të tensionuar që nga një konflikt i shkurtër në maj, luftimet e tyre më të këqija në dekada dhe çdo përmbytje për të cilën fajësohet Nju Delhi mund të përkeqësojë marrëdhëniet.

Zyrtarët pakistanezë thanë dje se kishin marrë një paralajmërim të papritur nga India se kishte ndërmend të lëshonte ujë nga Diga Madhopur, në anën e saj të provincës Penxhab.

India lëshon rregullisht ujë nga digat kur rezervuarët mbushen me ujë dhe teprica derdhet në Pakistan.

Një burim nga qeveria indiane tha se ata nuk përmendën ndonjë digë specifike, por shirat e dendur i shtynë ata të ndanin një paralajmërim të dytë me Pakistanin përmes kanaleve diplomatike.

Tre lumenjtë: Ravi, Sutlexh dhe Çenab, të cilët derdhen në Pakistan nga territori indian, po përballen me përmbytje të moderuara deri të rënda, tha sot Autoriteti Kombëtar i Menaxhimit të Fatkeqësive i Pakistanit.

Qindra fshatra të vendosura në brigjet e tre lumenjve janë evakuuar tashmë. sa/

foto: X