Shkup, 13 nëntor 2024 (MIA) - Komisioni parlamentar për zgjedhje dhe emërime sonte e ka përmbyuur seancën e 14-të ku u prezantuan kandidatët për Këshillin e ri shtatëanëtarësh të Agjencisë për Shërbime Mediatike Audio dhe Audiovizuele (ASHMAA). Nga 24 kandidatët që i plotësojnë kushtet e Konkursit, 22 kandidatë para deputetëve i kanë prezantuar biografitë dhe vizionet e tyre për punën e organit rregullator të mediave, pasi Mile Bosnjakovski dhe Viktor Grozdanov i kanë tërhequr kandidaturat e tyre.

Në fund të seancës, deputeti Gjorgjija Sajkovski tha se beson se të shtatë ata që do të zgjidhen "do të japin maksimumin" për përmirësimin e shërbimeve mediatike, por edhe se angazhimi i tyre në Këshillin e ASHMAA do të mundësojë punë më dinjitoze për gazetarët.

"Besoj se secili prej tyre do të jepte një kontribut maksimal sepse në debatin e sotëm publik dëgjuam performanca dhe ide mbresëlënëse për periudhën e ardhshme të ASHMAA-së", tha Sajkovski.

Në pjesën e pasdites së prezantimit të kandidatëve u prezantua Gordana Majnova, e cila ka diplomuar në Fakultetin Ekonomik në USHCM dhe ka përfunduar studimet master në komunikim. Ajo tha se ka mbi 20 vjet përvojë në radiodifuzion dhe ekonomi shëndetësore dhe se në Këshillin e Radiodifuzionit ka qenë që nga fillimi, në sektorin e ekonomisë, bashkëpunimit ndërkombëtar dhe marrëdhënieve me publikun. Siç tha ajo, fokusohet në tregun mediatik dhe ka përgatitur raporte financiare për punën e operatorëve dhe mediave.

Nëse zgjidhet, siç theksoi ajo, do të angazhohet fuqishëm për konsolidimin financiar të radiotelevizionit dhe zbutjen e dispozitave për përqendrim mediatik, përkatësisht për liberalizim, që do të mundësojë hyrjen e investitorëve të huaj në hapësirën mediatike maqedonase.

Kandidati Viktor Pavlovski, inxhinier mekanik nga USHM, i cili në 15 vitet e fundit punon në projekte filmike dhe televizive si producent ose organizator i produksionit televiziv dhe filmik, në prezantimin e tij tha se ka bashkëpunuar në projekte filmike maqedonase dhe të huaja dhe beson se ka përvojë në transmetimin e produkteve mediatike dhe programeve mediatike në përgjithësi dhe e njeh mirë teknologjinë mediatike.

Kandidati Vladimir Gjorgjievski, jurist i diplomuar në të drejtën evropiane dhe të BE-së, në prezantimin e tij tha se fokusi i tij i interesit është e drejta e pronës intelektuale dhe e drejta e autorit.

Nëse zgjidhet, ai do të angazhohet për ndryshime në rregulloren e medias me qëllim të respektimit të akteve të Bashkimit Evropian, duke deklaruar se ka marrë pjesë në grupet e punës për ndryshime në rregulloren e brendshme për përputhshmëri me legjislacionin e BE-së.

Elena Stojkovska, magjistre e inxhinierisë elektroteknike me 13 vjet përvojë pune në shkencat elektroteknike dhe teknologjitë informative dhe telekomunikacioni dhe punë në atë departament në termocentralet shtetërore, në prezantimin e saj theksoi se si një shkencëtare e re informative mund të kontribuojë në punën e ASHMAA-së dhe të qëllimi kyrsor i saj do të jetë zhvillimi teknik - teknologjik i këtij organi rregullator.

Kandidatja, Zerijeta Hajro Jajaga është gazetare me pothuajse 30 vjet përvojë në shërbimin publik që punon për çështje sociale. Aktualisht ligjëron në Departamentin e Gazetarisë në Fakultetin Juridik të Universitetit të Tetovës.

Si anëtare e Këshillit të ASHMAA, konsideron se do të kontribuojë për eterin mediatik dhe për të drejtat e punonjësve të medias, për lirinë e fjalës, e cila, siç theksoi, "është vendi më i shenjtë ku prek demokracia".

Jajaga, e cila është edhe anëtare e Komisionit për ankesa në Këshillin e Etikës në Media të Maqedonisë, tha se "politika duhet të jetë sa më larg këtij institucioni", duke theksuar se për lirinë e mediave në vend ka kritika nga faktorët ndërkombëtarë dhe se rregullisht përmendet në raportet e Komisionit Evropian.

Kandidatja, Cvetanka Minovska tha se 28 vjet është gazetare "profesionalisht dhe me vokacion", fillimisht në MRTV dhe më pas që nga themelimi i saj në agjencinë shtetërore të lajmeve MIA.

Siç tha ajo, e konsideron veten kroniste për një kohë shumë të gjatë, duke ndjekur profesionalisht ngjarje dhe procese të ndryshme në shoqëri, ndërsa mbrojtja dhe siguria kanë qenë në fokusin e karrierës së saj gazetareske.

Për të, liria e medias dhe liria e shprehjes së gazetarëve është më e rëndësishmja, prandaj ajo do të përpiqet për sigurinë dhe mbrojtjen e gazetarëve dhe punonjësve të medias, veçanërisht atyre që raportojnë nga terreni dhe nga ngjarje me rrezik të lartë, ndërsa në fokusin e saj do të jetë barazia gjinore mes gazetarëve.

Kandidati Stojanço Naumov, magjistër i komunikimit, i cili për një mandat ka qenë anëtar i ASHMAA-së, në prezantimin e tij theksoi se Këshillit të ASHMAA-së i duhet pluralizëm, siç tha ai, "një bazë më profesionale qytetare, arsimore dhe profesionale".

Ai theksoi se është e rëndësishme prania e komuniteteve më të vogla etnike, të cilat, tha ai, janë të margjinalizuara dhe gjuhët dhe mediat e tyre "pothuajse nuk ekzistojnë në këtë vend".

Kandidatja Afrona Verzivoli është diplomuar për menaxhim financiar në USHCM dhe është në studimet master në ekonominë monetare. Ajo ka përvojë në sektorin financiar, ka punuar në Ministrinë e Financave, në banka, si dhe në departamentin e financimit të një klinike.

Pas prezantimit të saj, me reagime iu bashkuan edhe deputetët e të dyja krahëve të Aleancës për Shqiptarët. Deputetja Ilire Dauti nga ASH, e cila është pjesë e koalicionit të Frontit Evropian, tha se i uron suksese Verzivolit, por theksoi se kandidatura e saj ka prapavijë politike.

"Pas reagimeve të BE-së për kryeauditorin e IPA-s, kam frikë se do të kemi edhe një veto tjetër nga Fridom haus, sepse nuk është kështu me kandidatët dhe nominimet që varen nga politika. Kërkoj mirëkuptim nga zonja Verzivoli, por nuk mundet të ketë nominim të bashkëshortes së një politikani të degës së Taravarit. I uroj një rrugëtim të suksesshëm, por këto gjëra duhen mbajtur të ndara. Ky Këshill nuk duhet të jetë politik", tha Dauti.

Ka reaguar Rijad Shaqiri nga ASH-ja në koalicionin Vlen, sipas të cilit, "është e ulët të flasësh për çështje familjare", pasi, tha ai, "Afrona duhet të jetë edhe gruaja e dikujt dhe nëna e dikujt".

Ai beson se deputeti i krahut tjetër të Aleancës ka tentuar të pengojë kandidimin e Verzivolit në një debat ku, siç tha ai, nuk merren vendime dhe nuk jepen konkluzione, por dëgjohen biografitë e kandidatëve.

Është përfshirë edhe deputeti Halil Snopçe, i cili ka pëlqyer ambicien dhe dëshirën e Verzivolit si eksperte financiare për të ndihmuar financimin e mediave.

Kandidati i fundit për anëtar të Këshillit të ASHMAA-së, i cili u paraqit para deputetëve ishte Boris Arsov, doktor i komunikimeve dhe sistemeve të komunikimit dhe doktor i shkencave ekonomike, siç tha ai i përkushtuar për komunikimet elektronike dhe zhvillimin e mediave elektronike.

Ai aplikoi në konkurs për të kontribuar me përvojën e tij kërkimore shkencore në zhvillimin teknik të mediave dhe komunikimeve elektronike, gjë që, tha ai, është shumë e rëndësishme në transmetimet radiotelevizive. mb/

Foto: printskrin