Tjenxhin, 1 shtator 2025 (MIA) - Organizata e Bashkëpunimit të Shangait (OBSH), e përbërë nga dhjetë vende, përfshirë Kinën, Rusinë dhe Iranin, paralajmëroi sot se është kundër çdo "rishqyrtimi" të rezolutës së KB-së mbi programin bërthamor të Iranit, prandaj evropianët po përgatiten të rivendosin sanksionet kundër Teheranit.

Shtetet anëtare të OBSH-së, në një deklaratë të përbashkët të publikuar nga Ksinhua, pohuan se "çdo përpjekje për të keqinterpretuar ose rishqyrtuar në mënyrë arbitrare këtë rezolutë do të minonte autoritetin e Këshillit të Sigurimit të KB-së".

Franca, Britania e Madhe dhe Gjermania, duke u thirrur në një klauzolë në marrëveshjen ndërkombëtare të vitit 2015, kanë njoftuar rivendosjen e sanksioneve të KB-së ndaj Iranit nëse nuk gjen një zgjidhje diplomatike për çështjen e tij bërthamore brenda 30 ditëve.

Gjatë samitit të OBSH-së, presidentët e Rusisë dhe Iranit, Vladimir Putin dhe Masud Pezeshkian, u takuan në Tjenxhin, njoftoi Kremlini, i cili më parë kishte thënë se fokusi i takimit do të ishte programi bërthamor i Teheranit.

Rusia, një aleate e Iranit, e ka mbështetur Teheranin për këtë çështje. Ajo u bëri thirrje vendeve perëndimore të premten që të "kthehen te arsyeja e shëndoshë dhe të rishqyrtojnë vendimet e tyre të gabuara", duke paralajmëruar për "pasojat e pariparueshme" të politikave të tyre.

Rusia dhe Irani janë afruar që nga fillimi i agresionit rus kundër Ukrainës në vitin 2022. Në janar të këtij viti, ato nënshkruan një marrëveshje partneriteti strategjik që synon forcimin e marrëdhënieve të tyre dypalëshe, veçanërisht në fushën e mbrojtjes, kujtojnë agjencitë perëndimore. sa/

foto: EPA