Nepjido, 1 prill 2025 (MIA) - Numri i viktimave nga tërmeti shkatërrues që goditi Mjanmarin është rritur në 2.719, derisa 4.521 persona janë lënduar, ndërsa 441 rezultojnë si të zhdukur, theksohet në deklaratën e gjeneralit Min Aun Hlajn, liderin e juntës ushtarake të vendit.

Gjenerali parashikon se numri i viktimave mund të kalojë mbi 3.000.

Disa vende kanë dërguar ndihma humanitare në Mjanmar dhe Tajlandën fqinje pas një tërmeti të fortë që goditi dy vendet e Azisë Juglindore të premten. Përpjekjet e ndihmës janë përqendruar në zonat më të goditura të Mjanmarit, ku numri i viktimave vazhdimisht po rritet.

Epiqendra e tërmetit ka qenë në afërsi të Mandalejt - qyteti i dytë më i madh në Mjanmar, me një popullsi prej rreth 1,5 milion banorë. Në Tajlandën fqinje, numri i viktimave është rritur në të paktën 18 persona, ndërsa 78 rezultojnë si të zhdukur, kryesisht punëtorë ndërtimi. Dhjetë nga viktimat vdiqën në kantierin e ndërtimit të ndërtesës së re të Shërbimit shtetëror të auditimit në Tajlandë, derisa tetë të tjerët vdiqën në pjesë të tjera të qytetit, transmeton "Bangkok post".

Operacionet e shpëtimit vazhdojnë. Dje, tre të mbijetuar u nxorën nga rrënojat – dy gra dhe një fëmijë, të cilët kaluan rreth 60 orë nën rrënoja. Një fëmijë pesë vjeçar, një grua shtatzënë dhe një grua 29-vjeçare u shpëtuan nga ekipet e urgjencës kineze, kumtoi agjencia e lajmeve në Mjanmar "Nau", duke cituar ambasadën kineze në vend.

Tërmeti me magnitudë 7.7 ballë shkaktoi shembjen e shumë ndërtesave dhe dëmtimin e rrugëve, pas çka duke komplikuar më tej përpjekjet e shpëtimit në zonat e prekura. rq/

Foto: EPA