Najpido, 31 mars 2025 (MIA) – Junta në Mjanmar sot kumtoi se nga tërmeti më shumë se 1.700 persona kanë vdekur, ndërsa 3.400 janë lënduar. Për shkak të numrit të lartë të viktimave, në vend është shpallur shtatë ditë zie.

Ekipet e shpëtimit në Mjanmar po përballen me pengesa të mëdha, derisa përpiqen të arrijnë komunitetet e goditura nga tërmeti, kumtoi Komiteti ndërkombëtar i shpëtimit (International Rescue Committee).

Rrugët janë të dëmtuara dhe të bllokuara nga rrëshqitjet e dheut dhe mbeturinat, derisa probleme shtesë krijohen nga infrastruktura e dobët e komunikimit, veçanërisht në qendrat e qyteteve, si dhe ndërprerjet e shpeshta të energjisë elektrike.

Ekipet e shpëtimit për momentin janë afër epiqendrës në Mandalej. Ata raportuan se një numër i madh i qytetarëve flenë në qiell të hapur, nuk ka mjaft tenda apo vende të sigurta për t'u strehuar. Qytetarët poashtu përballen edhe me mungesën e ujit.

Më herët, Margaret Haris nga Organizata Botërore e Shëndetësisë deklaroi se spitalet në Mjanmar janë dëmtuar, të mbingarkuara dhe në rrezik të përhapjes së sëmundjeve infektive.

Të paktën tre spitale janë plotësisht jofunksionale, ndërsa 22 janë pjesërisht të dëmtuara dhe praktikisht në gjendje mosfunksionimi", tha Haris, duke shtuar se punonjësit humanitarë përballen me përhapjen e mundshme të sëmundjeve infektive, siç është kolera.

Mjanmari më 28 mars u godit nga një tërmet i madh me magnitudë 7.7 ballë, me epiqendër afër qytetit Mandalej, në një thellësi prej rreth 20 kilometra. Tërmeti i madh u ndje edhe në Tajlandë dhe vende të tjera aziatike. Pak minuta më vonë ka ndodhur një tërmet i dytë me intensitet 6.4 ballë.

Sipas gjeologut amerikan Xhes Feniks, tërmeti i regjistruar në Mjanmar lëshoi ​​energji ekuivalente me 334 bomba atomike. Sipas saj, pasgoditjet mund të zgjasin me muaj pasi pllaka tektonike indiane vazhdon të zbresë nën pllakën euroaziatike në rajonin e Mjanmarit.

Sipas një simulimi nga Shërbimi gjeologjik i SHBA-së, numri i viktimave mund të tejkalojë 10.000 njerëz në Mjanmar dhe humbjet mund të jenë më të mëdha se vlera e produktit të brendshëm bruto të vendit.

foto: EPA