Medelin, 13 janar 2024 (MIA) - Një katastrofë e madhe natyrore ka ndodhur dje në Kolumbinë veriperëndimore pasi një pjesë e një mali u shkëput pas reshjeve të mëdha të shiut dhe ra mbi një rrugë, duke shkaktuar vdekjen e të paktën 18 personave, përderisa 30 të tjerë janë lënduar.Rrëshqitja e dheut ka ndodhur në afërsi të qytetit Karmen de Atrato.

Shpëtimtarët lokalë presin që numri i të vdekurve dhe të plagosurve të rritet. 

Aksidenti ka ndodhur rreth orës 16 sipas kohës lokale, përderisa veturat prisnin në rrugë të frekuentuar e cila i lidh qytetet Medelin dhe Kuidbo, informojnë mediat e Kolumbisë. 

Njerëzit mbetën të ngujuar në automobilat e tyre nën ortekun me baltë dhe gurë i cili u rrëzua mbi ta. 

Një incizim nga momenti dramatik, i publikuar në rrjetet sociale, tregon se njerëzit në automjete nuk kanë pasur mundësi që të iknin. 

Presidenti i Kolumbisë, Gustavo Petro deklaroi se qeveria do ta sigurojë të gjithë ndihmën e nevojshme, duke e përshkruar ngjarjen në rrjetet sociale si "tragjedi të tmerrshme".

Haime Herera, kryetari i Karmen de Atrata, deklaroi për televizionin lokal se besohet se disa njerëz ende janë të bllokuar nën ortek. 

Kompetentët paralajmëruan se do të fillojnë operacion për kërkimin e të zhdukurve. 

Ministria e Mbrojtjes njofton për reshje të mëdha të shiut në këtë zonë, gjë që i vështirëson operacionet e shpëtimit. fc/

Fotografia: X