Uashington, 28 mars 2025 (MIA) - Nënpresidenti amerikan Xhej Di Vens dhe bashkëshortja e tij Usha sot udhëtojnë për në Grenlandë, veprim që ka ngjallur tensione diplomatike, njofton DPA.

Vizita vjen në kohën kur presidenti amerikan Donald Tramp vazhdon të shprehë interesin për vendosjen e ishullit të Arktikut nën kontrollin e SHBA-së, një veprim që solli rezistencë të fortë nga liderët në Grenlandë.

Vens dhe Usha do të vizitojnë bazën hapësinore amerikane Pitufik, në bregun veriperëndimor të Grenlandës e cila ofron paralajmërim raketash, mbrojtje raketore dhe mbikëqyrje hapësinore. Ata do të takohen gjithashtu edhe me personelin ushtarak amerikan të vendosur në ishull.

Usha Vens fillimisht kishte planifikuar të udhëtonte pa bashkëshortin e saj, të merrte pjesë në garën e përvitshme me sajë të qenve dhe të vizitonte kryeqytetin Nuk, së bashku me aktivitete të tjera kulturore.

Por nënpresidenti amerikan Vens njoftoi të martën se do ta shoqëronte, duke thënë se ka për qëllim të vlerësonte situatën e sigurisë në rajon.

Udhëtimi gjithashtu u reduktua në një ditë dhe pjesëmarrja në garën me sajë të qenve është anuluar.
Planet e udhëtimit kanë ngritur shqetësime tek qeveria e Grenlandës e cila theksoi se nuk është dërguar ftesë deri te delegacioni amerikan.

Grenlanda, një territor kryesisht autonom i Danimarkës, është ishulli më i madh në botë dhe i rëndësishëm strategjikisht për shkak të vendndodhjes së saj në Arktik, si dhe lëndëve të para. Përveç kësaj, në rajon kalojnë rrugë të rëndësishme detare.

"Gjatë Luftës së Dytë Botërore, SHBA krijoi një duzinë bazash ushtarake në Grenlandë për të mbrojtur Atlantikun e Veriut nga pushtimi nazist. Gjatë Luftës së ftohtë, SHBA i kushtoi resurse shtesë Grenlandës për t'u mbrojtur ndaj sulmeve raketore sovjetike", thuhet nga kabineti i Vensit.

Foto: EPA