Berlin, 8 prill 2023 (MIA) - Pas më shumë se tre vitesh, sot në Gjermani përfundojnë masat mbrojtëse kundër pandemisë së Kovid-19, por politikanët paralajmërojnë se koronavirusi ende paraqet rrezik për shëndetin.

"Masat janë hequr, por kjo nuk do të thotë se është zhdukur koronavirusi. Vigjilenca dhe monitorimi i situatës në terren vazhdojnë të jenë instrumente të politikës së mbrojtjes nga sëmundjet infektive", deklaroi Janosh Dahmen, zëdhënës për politikën shëndetësore të Partisë së Gjelbër në pushtet.

Prej ditës së sotme pushojnë së zbatuari masat e fundit si detyrimi për mbajtjen e maskës FFP2 në objektet shëndetësore dhe shtëpitë e të moshuarve për vizitorët. Këto institucione mund të vendosin vetë rregullat për mbajtjen e maskës.

Nga sot hiqen edhe kufizimet për hyrjen në Gjermani për shkak të pandemisë së koronavirusit.

Masat si detyrimi për të mbajtur maska ​​në transportin publik u hoqën në shkurt.

Rregullat për vaksinimin kundër koronavirusit po kalojnë nga gjendja e jashtëzakonshme në një sistem të rregullt shëndetësor.

Në Gjermani, disa mijëra raste të reja të personave të infektuar me koronavirus vazhdojnë të regjistrohen çdo ditë.

Sipas Institutit Federal për sëmundjet infektive, Instituti Robert Koh, të enjten në Gjermani janë regjistruar 3.136 raste të reja të infektimit, krahasuar me një ditë më parë. Pavarësisht kësaj, ministri i Shëndetësisë Karl Lauterbah javën e kaluar deklaroi  se pandemia në Gjermani është "kapërcyer me sukses". mb/

Foto: Arkivi i MIA-s