Bruksel, 5 qershor 2025 (MIA) - Samiti i NATO-s në Hagë, mbështetja për Ukrainën dhe përforcimi i parandalimit dhe mbrojtjes do të jenë tema kryesore të takimit të sotëm të ministrave të mbrojtjes së NATO-s në Bruksel, ku do të marrë pjesë edhe ministri i Maqedonisë, Vlado Misajlovski.

Takimi do të fillojë me një mbledhje të Këshillit Veriatlantik në të cilin ministrat do të bisedojnë për përgatitjet e Samitit në Hagë që duhet të mbahet nga data 24 deri më 26 qershor dhe për shpenzimet e mbrojtjes, ndërsa sipas njoftimeve, do të merren edhe vendime të rëndësishme për përmirësimin e parandalimit dhe mbrojtjes së NATO-s.

Siç njoftoi sekretari i përgjithshëm i NATO-s, Mark Rute në konferencën e djeshme për media, në prag të takimit ministror, ai do të shënojë një hap të madh përpara në përforcimin e kapaciteteve për parandalimin dhe mbrojtjen e Aleancës me harmonizimin e qëllimeve të reja ambicioze.

"Këto qëllime konfirmojnë forcat dhe kapacitetet konkrete që aleatët duhet t'i sigurojnë për ta përforcuar kthimin dhe mbrojtjen tonë", tha Rute.

Për realizimin e këtyre qëllimeve, për përballje me çdo kërcënim dhe për zbatimin e plotë të planeve për mbrojtje kolektive, sipas Rutes, Aleancës i nevojiten më shumë burime, forca dhe kapacitete, e cila kërkon ndarje dukshëm më të larta të mbrojtjes.

 "Bota po bëhet gjithnjë e më e rrezikshme. Ekziston lufta brutale e Rusisë ndaj Ukrainës, kërcënimi nga terrorizmi dhe intensifikimi i konkurrencës globale. Do të vazhdojmë t'i mbrojmë njerëzit tanë dhe mënyrën tonë të jetesës. Prandaj duhet ta bëjmë NATO-n një Aleancë më të fortë dhe më të drejtë", tha Rute.

Siç njoftoi korrespondenti i MIA-s nga Brukseli, në prag të takimit burime të Misioni të SHBA-së pranë NATO-s brifuan se kur bëhet fjalë për shpenzimet në mbrojtje ndarjet në nivel prej pesë për qind të PBB-së nuk do të jenë vetëm premtim i vendeve anëtare, por edhe obligim i tyre.

Ata shtuan se çdo aleat duhet të obligohet të investojë të paktën pesë për qind të PBB-së në mbrojtje dhe siguri duke filluar prej tani, duke theksuar se ky nuk është sugjerim, por bazë për kthimin në botë ku kërcënimet vazhdimisht rriten.

"Duam që të gjithë aleatët t'i rrisin buxhetet e tyre aq sa munden dhe sa më shpejtë që munden. Ky nuk është një afat kohor që e vendos SHBA, por kundërshtarët tanë dhe aftësia e tyre të udhëheqin luftë kundër Aleancës", theksuan burimet diplomatike.

Ndryshe, në kuadër të takimit do të mbahet edhe një mbledhje jo formale e Këshillit NATO-Ukrainë në formë të drekës së punës, në të cilën do të bisedohet për mbështetjen e vazhdueshme të Aleancës për Kievin, si dhe për nevojën e menjëhershme për arritje të paqes.

Siç theksoi Rute në konferencën e djeshme për media, qëllimi i mbështetjes së NATO-s për Ukrainën në ballafaqimin me agresionin rus nuk është vazhdim i luftës, por sigurim i kushteve që vendi të mund të mbrohet aktualisht dhe të parandalojë çdo lloj agresioni në të ardhmen.

Rute shtoi edhe se NATO-ja plotësisht i mbështet përpjekjet e presidentit amerikan Donald Tramp të ndalet me gjakderdhjen në Ukrainë dhe arritjen e drejtë dhe të qëndrueshme të paqes.

Në fund të takimit ministror është parashikuar mbledhje e Grupit për planifikim bërthamor të NATO-s. Sipas Rutes, qëllimi themelor i kapacitetit bërthamor të Aleancës është ta ruajë paqen, të parandalojë presione dhe të kthejë agresion, prandaj parandalimi bërthamor është gurthemeli i sigurisë së NATO-s.

Përveç ministrave të mbrojtjes të anëtarëve të NATO-s, në takimin ministror pritet të marrin pjesë edhe homologu i tyre ukrainas Rustem Umerov dhe përfaqësuesja e Lartë e BE-së për Punët e Jashtme dhe Politikën e Sigurisë Kaja Kallas.

Në pritje të mbledhjes së sotme, dje pasdite në selinë e NATO-s në Bruksel u mbajt një takim i Grupit të Kontaktit të Mbrojtjes së Ukrainës, i kryesuar nga ministrat e Mbrojtjes të Britanisë së Madhe dhe Gjermanisë, Xhon Hejli dhe Boris Pistorius. sa/

Foto: Ministria e Mbrojtjes/ MIA