Bruksel, 16 maj 2022 (MIA) - Pas publikimit të kandidaturave të Suedisë dhe Finlandës për anëtarësim në NATO, ministri austriak i Punëve të Jashtme, Aleksandar Shalenberg tha sot se Austria nuk planifikon të anëtarësohet në aleancën ushtarake. "Ne kemi një situatë krejtësisht të ndryshme gjeografike," tha Shallenberg në margjinat e takimit të ministrave të Punëve të Jashtme të BE-së në Bruksel. "Ne kemi një histori shumë të ndryshme dhe unë besoj se kjo thjesht duhet të merret parasysh," shtoi ai. Megjithatë, kjo nuk do të thotë se Austria është politikisht neutrale. "Nuk ka asnjë neutralitet në luftën kundër agresionit," tha ai, duke iu referuar pushtimit rus të Ukrainës. “Ne kemi marrë një qëndrim shumë të qartë, ne mbështesim të gjitha sanksionet dhe po bëjmë atë që mundemi në aspektin e mbështetjes”, shtoi ministri austriak i Punëve të Jashtme. I pyetur nëse siguria e Austrisë mund të garantohet pavarësisht se mbetet jashtë NATO-s, Shellenberg tha se Austria synon të rrisë investimet në sigurinë e saj. “Ishte e rëndësishme të kuptojmë se bota nuk është aq miqësore sa do të donim të ishte”, tha ai, duke shtuar se kishte vende që ishin të gatshme të përdornin forcën ushtarake për të ndjekur interesat e tyre. ls/