Shkup, 7 shkurt 2023 (MIA) - Ministri teknik i Punëve të Jashtme i Bullgarisë, Nikollaj Millkov, njoftoi sot në një konferencë për media se sekretari i klubit bullgar "Car Borisi i Tretë" në Ohër, Hristijan Pendikov, i cili u transportua në Bullgari me një aeroplan qeveritar bullgar pas incidentit në Ohër në të cilin ai pësoi lëndime, do të marrë shtetësinë bullgare sa më shpejt të jetë e mundur, raportoi BNT.

Pendikov, i cili dje u shkarkua nga Akademia Mjekësore Ushtarake në Sofje, siç tha Millkov, do të marrë edhe vendbanim të përkohshëm gjatë qëndrimit në Bullgari. Sipas Millkovit, ai "frikësohet për jetën e tij" nëse kthehet në vend dhe për këtë arsye është duke u shqyrtuar opsioni për t'i siguruar atij siguri personale.

Millkov, siç raporton BNT, ka vlerësuar se “edhe krahas  përpjekjeve për rregullimin e marrëdhënieve ndërmjet Maqedonisë së Veriut dhe Bullgarisë, për momentin nuk ka sukses”.

"Përpjekjet për të përmirësuar dhe qetësuar marrëdhëniet midis Bullgarisë dhe Maqedonisë së Veriut në fakt u minuan nga veprimet specifike të autoriteteve në Shkup. Kjo, natyrisht, shënon një pikë të re, edhe më të ulët në marrëdhëniet tona", ka deklaruar Millkov.

Pendikov dje u prit në rezidencën presidenciale nga presidenti bullgar Rumen Radev, i cili tha se shteti bullgar “nuk do të tolerojë dhunën ndaj bullgarëve në Republikën e Maqedonisë së Veriut dhe ndaj qytetarëve të saj dhe do të përdorë të gjitha instrumentet  kombëtare dhe ndërkombëtare për të mbrojtur të drejtat e tyre. sa/