Beograd, 14 mars 2025 (MIA) – Mijëra protestues, kryesisht studentë, gjenden në kryeqytetin e Serbisë, Beograd para protestave të planifikuara masive antiqeveritare të caktuara për nesër. Atmosfera në Beograd është e tensionuar, në një moment kur autoritetet po përforcojnë përpjekjet dhe thirrjet ndaj njerëzve që të dalin nesër në rrugë, informon MIA nga Beogradi. 

Kryeministri në largim Milosh Vuçeviq i cili dha dorëheqje për shkak të protestave, dërgoi kërcënim se do të përdorë forcë që t’i shtypë protestuesit të cilët pritet të jenë më së shumti në numër gjatë viteve të kaluara. 

Presidenti serb, Aleksandar Vuçiq vazhdimisht paralajmëron se planifikohet dhunë në tubimin të premten dhe u kërcënua me arrestime nëse ka çfarëdo lloj incidente. 

Në fjalimin para kombit për tubimin e nesërm të qytetarëve serbë në Beograd, ai theksoi se “shteti do t’i ndërmarrë të gjitha masat”. Ai nuk saktësoi çfarë, por paralajmëroi arrestim të çdonjërit që shkakton incidente. 

Vuçiqi shtoi se çdonjëri që do t’i sulmojë protestuesit do të arrestohet, si dhe “protestuesit nëse bëjnë përpjekje të sulmojnë institucione”. 

 “Ju bëj thirrje të gjithëve të mos shkaktojnë trazira”. 

Mbështetësit e Vuçiqit po qëndrojnë në qendrën e qytetit, përballë pallatit të presidentit, me çka nxitet frikë nga përleshje të mundshme me protestuesit. 

Policia arrestoi sot gjashtë aktivistë dhe anëtarë të një partie opozitare të dyshuar për "përgatitjen e veprimeve kundër rendit kushtetues dhe sigurisë", pasi një incizim i supozuar i takimit të tyre në të cilin ata diskutonin për këtë u transmetua një ditë më parë në stacionet televizive pro-qeveritare.

Transmetimet e drejtpërdrejta të mediave elektronike lokale tregojnë se si qindra studentë po hyjnë në Beograd nga qytete të tjera përgjatë shtetit dhe po shkojnë drejt qendrës. 

Tubimet pritet të jenë më të mëdhatë pasi filluan protestat gati çdo ditëshe pasi humbën jetën 15 persona kur ra një tendë në stacionin hekurudhor më 1 nëntor në Novi Sad, katastrofë për të cilën kundërshtarët thonë se është për shkak të korrupsionit. 

Studentë, mësimdhënës, bujq dhe punëtorë u përfshinë në protesta dhe kjo sipas mediave në Beograd është sfidë e madhe për Vuçiqin, i cili është në pushtet 12 vjet si kryeministër dhe si president. 

Njerëzit dhe studentët besnikë të Vuçiqit kanë mbërritur në kryeqytetin serb dhe janë duke kampuar në afërsi të kabinetit të tij në qendër të qytetit. Hyrja në Andriqev venac është e rrethuar me traktorë gjatë natës.

Në një paraqitje televizive, kryeministri në largim Millosh Vuçeviq tha se policia do të intervenojë në rast dhune. 

 “Shteti ka ... aparat për forcë, ju lutem mos provokoni”, tha ai. 

Patriarku Porfirie, kreu i Kishës Ortodokse Serbe, bëri thirrje “të gjithë, pa përjashtim, ta refuzojnë dhunën”. 

Në dhjetor të vitit të kaluar, studentët dhanë një varg kërkesash të cilat përfshijnë publikimin e dokumenteve lidhur me katastrofën në stacionin hekurudhor dhe marrjen e përgjegjësisë. 

Të akuzuar nga autoritetet gjyqësore për këtë katastrofë janë 13 persona, ndërsa qeveria paralajmëroi fushatë antikorrupsioni në të cilën deri më tani janë arrestuar dhjetëra njerëz. fc/

Fotografia: MIA