Berlin, 6 tetor 2025 (MIA) - Kancelari gjerman Fridrih Merci deklaroi se supozon se Rusia qëndron pas një sërë dronësh  që fundjavën e kaluar janë parë mbi Gjermani, përfshirë ato që ndërprenë dhjetëra fluturime dhe lanë më shumë se 10.000 pasagjerë të bllokuar në aeroportin e Mynihut.

 Merci theksoi se frekuenca e ndërhyrjeve të tilla në hapësirën ajrore evropiane është pa precendent, madje edhe në krahasim me Luftën e Ftohtë. Ai shtoi se deri më tani asnjë nga dronët nuk ishte armatosur dhe se të gjithë kishin fluturuar për qëllime zbulimi.

 Në javët e fundit, dronë të ngjashëm të paidentifikuar janë parë mbi disa vende evropiane. Në Danimarkë,  në javët e fundit janë regjistruar fluturime të shumta të dronëve të paidentifikuar mbi objekte dhe aeroporte ushtarake.

 Për shembull, janë raportuar fluturime mbi aeroportin në bazën ajrore Karup dhe disa aeroporte daneze. Për shkak të kësaj, autoritetet ndaluan përkohësisht fluturimet e dronëve civilë dhe rritën mbikëqyrjen, dhe inteligjenca daneze konfirmoi se këto ishin "sulme hibride" për të cilat e akuzuan Rusinë.

 Fluturime të dyshimta me dronë mbi baza ushtarake dhe infrastrukturë strategjike janë raportuar edhe në Gjermani dhe Belgjikë. Për shembull, rreth 15 dronë u vunë re mbi bazën ushtarake belge Elzenborn, dhe në Gjermani, autoritetet thonë se incidentet po bëhen më të shpeshta, veçanërisht pranë objekteve ushtarake dhe industriale.

 Foto: Arkivi i MIA-s