Bruksel, 19 mars 2026 (MIA) - Bashkimi Evropian duhet të përgatitet për një valë të re migrimi, paralajmëruan sot kryeministrja italiane Xhorxha Meloni dhe kryeministrja daneze Mete Frederiksen në një letër drejtuar kryetares së Komisionit Evropian Ursula fon der Lajen, duke theksuar rrezikun e një krize humanitare të ngjashme me atë të vitit 2015.

Në letrën, e cila u pa nga portali "Euraktiv" me seli në Bruksel, kryeministret italiane dhe daneze paralajmërojnë se konfliktet në Lindjen e Mesme mund të shkaktojnë një valë të madhe refugjatësh dhe migrantësh, gjë që jo vetëm që do të përfaqësonte një katastrofë humanitare për të prekurit, por gjithashtu do të kërcënonte sigurinë dhe kohezionin e Unionit.

"Ne mund t'i ndihmojmë njerëzit në mënyrë më efektive duke e drejtuar drejtpërdrejt mbështetjen në rajonet e tyre të origjinës", thanë Meloni dhe Frederiksen.

Në letër shtohet se Komisioni dhe agjencitë përkatëse të BE-së duhet të jenë të gatshme të ofrojnë mbështetje të shpejtë sipas kërkesës, si dhe të shqyrtojnë mekanizmat e reagimit emergjent në rast të valëve të papritura të migrimit.

"Ua kemi borxh qytetarëve evropianë dhe popullatave të prekura të veprojmë shpejt dhe të jemi të përgatitur. Këtë herë, ne duhet të jemi të përgatitur dhe të veprojmë", theksojnë Meloni dhe Frederiksen.

Kryeministret theksojnë se konflikti i zgjeruar në rajon është tashmë shqetësues dhe se ekziston nevoja që BE-ja të ofrojë menjëherë mbështetje të mjaftueshme për vendet partnere.

"Nuk duhet ta lejojmë veten të habitemi si në të kaluarën. Kjo do të thotë forcim i mëtejshëm i kufijve tanë dhe sigurim që të gjitha shtetet anëtare të BE-së të jenë të pajisura në mënyrë adekuate për të kontrolluar kufijtë e jashtëm", ​​deklarojnë ato. sa/

foto: EPA arkivi