Uashington, 10 qershor 2025 (MIA) - Një batalion i marinsave është vendosur tashmë në Los Anxhelos. Komandanti i Korpusit të Marinës, gjenerali Erik Smit deklaroi se marinsat janë të përgatitur të ndjekin urdhrat e Komandës Veriore të SHBA-së, por se ende nuk janë thirrur që të ndërhyjnë.

 Smiti gjatë debatit të buxhetit në Senat theksoi se marinsat janë të trajnuar për kontrollin e turmave dhe se pajisjet e tyre do të përfshijnë mburoja dhe shkopinj. Ai theksoi se ata nuk kanë autoritetin për të bërë arrestime dhe se janë në Los Anxhelos vetëm për të mbrojtur pronën federale dhe personelin federal.

 Zëdhënësja e Komandës Veriore të SHBA-së konfirmoi se 700 marinsa janë vendosur në zonën e madhe të Los Anxhelosit.

Në zonën e madhe të Los Anxhelosit janë vendosur edhe përafërsisht 2.100 pjesëtarë të Gardës Kombëtare të Kalifornisë. 2.000 anëtarë të tjerë të Gardës Kombëtare janë autorizuar të vendosen, por ende nuk kanë mbërritur në Los Anxhelos. 

 Departamenti Amerikan i Mbrojtjes bëri të ditur se vendosja e Gardës Kombëtare dhe Marinës në Los Anxhelos do të kushtojë rreth 134 milionë dollarë. Sipas ndihmëses speciale të Ministrit të Mbrojtjes, Brin Mekdonel, shpenzimet lidhen kryesisht me udhëtimin, akomodimin dhe ushqimin.

 Foto: Iks