Moskë, 21 maj 2025 (MIA) – Ministri rus i Punëve të Jashtme, Sergej Lavrov, sot deklaroi se nuk mund të ketë armëpushim para se të ketë negociata për Ukrainën dhe tha se Rusia nuk do të mashtrohet nga propozimet që së pari të shpallet armëpushim në Ukrainë dhe pastaj të kalohet në zgjidhjen e konfliktit.

"Kur na thonë: "Le të bëjmë narmëpushim, pastaj do ta shohim" - jo, djema. Ne kemi qenë tashmë në ato histori, nuk e duam më këtë. Ndërsa Makron, Starmer, fon der Lajen dhe figura të tjera evropiane që tani po kërkojnë me histeri që SHBA-ja t'u bashkohet veprimeve anti-ruse dhe të rrisin numrin e sanksioneve - kjo thjesht u bën nder, tha Lavrov, duke iu drejtuar mësuesve dhe studentëve të Universitetit ruso-armen.

Lavrov kujtoi se Perëndimi e ka mashtruar tashmë Rusinë në vitin 2014, kur organizoi një grusht shteti në Kiev menjëherë pasi autoritetet ukrainase dhe opozita arritën një marrëveshje.

"Pastaj erdhën Marrëveshjet e Minskut, të cilat, siç pranuan më vonë politikanët evropianë, ishin të nevojshme vetëm për të blerë kohë për Kievin. Në vitin 2022, në negociatat në Stamboll, Rusia dhe Ukraina inicializuan parimet e zgjidhjes, por Perëndimi i ndaloi autoritetet në Kiev të nënshkruanin një marrëveshje të bazuar në to”, tha Lavrov, i transmetuar nga mediat ruse. 

Kreu i diplomacisë ruse theksoi se Bashkimi Evropian angazhohet për një përshkallëzim të konfliktit ukrainas me qëllim që të vazhdojë armatosjen e regjimit në Kiev.

"Duke u kthyer te ajo që Bashkimi Evropian priste nga telefonata midis Presidentit të SHBA-së Donald Tramp dhe Presidentit rus Vladimir Putin. Ata thanë: "Do ta shohim." Pas bisedës, Tramp dhe Putin dhanë një vlerësim shumë pozitiv, duke rënë dakord që duhet të punohet për të përgatitur hapa konkretë për një zgjidhje afatgjatë dhe të qëndrueshme, duke përfshirë edhe shfrytëzimin e mundësisë së një armëpushimi, tha Lavrov.

Ai theksoi se fokusi i bisedimeve është në eliminimin e shkaqeve rrënjësore të konfliktit.

"Çfarë bëri Bashkimi Evropian? Publikoi se pakoja e 17-të e sanksioneve (kundër Rusisë) është miratuar. Kjo do të thotë se ata donin një përshkallëzim të krizës. Ata thanë: Po, ne dëgjuam dhe nuk pamë mbështetje për një armëpushim pa kushte, i cili do të na lejonte ne, evropianëve, të armatosnim Ukrainën. Kjo është ajo që u duhet atyre", tha Lavrov.

Siç vlerësoi, këto trende tregojnë se struktura e sigurisë euroatlantike, veçanërisht brenda kornizës së Organizatës për Siguri dhe Bashkëpunim në Evropë, po "bëhet e vjetëruar".

Negociatat e para midis Moskës dhe Kievit në tre vitet e fundit u mbajtën në Stamboll më 16 maj. ls/

Foto: Arkivi i MIA-s