Shkup, 17 mars 2025 (MIA) - Prokurori publik shtetëror, Lupço Kocevski, njoftoi se në lidhje me aksidentin në lokalin e natës "Puls" në Koçan, ku humbën jetën 59 persona, po punohet për procedimin e 14 të dyshuarve. Ai bëri të ditur se dyshohen për "krime të rënda kundër sigurisë publike" nga neni 292 i Kodit Penal me dënim me burg prej së paku tre vjet pa kufi të sipërm dënimi, i cili mund të shkojë deri në 20 vjet. Ai tha gjithashtu se po hetohen aktet e marrjes dhe dhënies së ryshfetit, si dhe prokurimi i paligjshëm i lëndëve piroteknike.

Në një deklaratë për media para Prokurorisë Themelore Publike në Koçan, Kocevski informoi se ekipi i prokurorëve, i cili nga mëngjesi i sotëm është zgjeruar në nëntë prokurorë publikë, intensivisht po vepron dhe po ndërmerr veprime për sigurimin e dëshmive për përcaktimin e përgjegjësisë.

"Besoj se vetë numri i prokurorëve publikë të përfshirë në procedurë tregon seriozitetin dhe peshën e kësaj ngjarje. Gjatë gjithë ditës së djeshme dhe të sotme janë lëshuar shumë urdhra dhe janë ndërmarrë një numër i madh veprimesh. Përveç një numri të madh të veprimeve hetimore për mbledhjen e gjurmëve dhe provave, janë lëshuar edhe 59 urdhra për obduksion, urdhër për sigurimin e video-materialit dhe urdhër për konfiskim të dokumentacionit nga personi juridik, si dhe ekspertizë të telefonave celularë", njoftoi Kocevski.

Ai shtoi se me urdhra të siguruara nga Prokuroria Publike Shkup, janë bërë bastisje në Ministrinë e Ekonomisë dhe në dy lokacione të tjera në Shkup, si dhe janë dhënë urdhër për bastisje të kompjuterëve dhe serverëve në Ministri dhe ekzaminim grafologjik të nënshkrimeve në dokumente të caktuara.

"Dje dhe sot janë lëshuar shumë urdhra dhe veprime. Ndër to, janë dhënë në vend 59 urdhra për autopsi, urdhra për sigurimin e video-materialeve, pajisjen me dokumentacion nga personi juridik dhe këqyrjen e celularëve. Me urdhër të siguruar përmes Prokurorisë Publike janë bërë bastisje në Ministrinë e Ekonomisë dhe dy institucione tjera", shtoi Kocevski.

"Policia është e autorizuar të arrestojë këdo që ka kontribuar në pasojat katastrofike, me veprime apo mosveprime të tyre”, tha Kocevski.

Ai tha se Prokuroria ka kërkuar me urgjencë përfshirjen e inspektoratit të ndërtimit dhe të punës.

"Ne vlerësojmë se këto gjetje janë ato që do të përcaktojnë të gjithë procedurën. Ka pasur indikatorë të mospërputhshmërisë që kur ky objekt është vënë në funksion dhe funksionon. Duke qenë se ka një organ të centralizuar të punës në shërbimet inspektuese, do të dërgohet kërkesa në këshillin inspektues për gjetjen e palës përgjegjëse me veprimin apo mosveprimin e të cilit ka ardhur deri te ky rezultat", tha Kocevski.

Shtoi se në Gjykatën Themelore në Koçan aktualisht janë duke u mbajtur seancat lidhur me propozimet për paraburgim afatshkurtër.

"Gjatë ditës së djeshme jeni njoftuar se një masë e tillë është propozuar për tetë persona, ndërsa tre janë të shtruar në gjendje të rëndë shëndetësore dhe procedura për këta persona do të vazhdojë menjëherë me përmirësimin e gjendjes së tyre shëndetësore. Aktualisht po zhvillohen seancat lidhur me propozimet për paraburgim dhe personat ndodhen në gjykatë. Gjithsej deri në këtë moment po punohet për procedimin urgjent të 14 personave të siguruar nga veprimet tona deri në këtë pikë. Sa i përket këqyrjes, mund të them se janë siguruar të gjitha faktet dhe dëshmitë e rëndësishme relevante në vendin e ngjarjes dhe po vijojnë analizat shtesë dhe ekspertizat nga zona përkatëse", tha ai, duke shtuar se ka mundësi që gjatë kësaj jave të inicohet një procedurë hetimore.

Kocevski nuk konfirmoi konkretisht se masat vlejnë edhe për ish-ministrin e Ekonomisë, Kreshnik Bekteshi, kryetarin e Komunës së Koçanit, Lupço Papazov, si dhe për inspektorët nga komuna.

"Do të përfshihen të gjithë personat për të cilët ekipi i prokurorëve publikë do të konstatojë se kanë apo nuk kanë ndërmarrë ndonjë aktivitet që i nënshtrohet ligjit penal", tha ai.

I pyetur nëse mund të garantojë zbardhjen e rastit, ai u përgjigj se "u premtoj qytetarëve se hetimi do të jetë i shpejtë, efikas dhe të gjithë ata që kanë kryer akte inkriminuese do të mbajnë përgjegjësi".

Për protestat që po zhvillohen në Koçan pas fatkeqësisë, ai tha se deri më tani nuk ka pasur veprime të kundërligjshme.

Në zjarrin që ka rënë në diskotekën "Puls" në Koçan, 59 persona kanë humbur jetën dhe 155 janë lënduar.

Sipas hetimeve të deritanishme të institucioneve, diskoteka nuk kishte rrjet hidranti dhe aparate zjarrfikëse të mjaftueshme, janë përdorur ilegalisht materialet piroteknike, nuk ka pasur as licencë të ligjshme operimi, si dhe nuk ishte lidhur asnjë marrëveshje me shkrim mes organizatorit dhe grupit interpretues. mb/

Foto: MIA