Nju-Jork, 6 mars 2025 (MIA) - Kombet e Bashkuara kanë aktivizuar 110 milionë dollarë nga Fondi Qendror për Raste Urgjente për të ndihmuar krizat e neglizhuara në mbarë botën, pasi donatorët kryesorë, përfshirë edhe SHBA-në, reduktuan ndjeshëm mbështetjen e tyre financiare.

Sipas një kumtese zyrtare të KB-së, gjendja financiare për ndihmën humanitare është përkeqësuar prej vitesh, por një goditje shtesë ishte vendimi i administratës së Donald Trampit muajin e kaluar për të ngrirë ndihmat e huaja në vlerë 60 miliardë dollarë. 

"Për vendet e prekura nga konflikti, ndryshimet klimatike dhe turbulencat ekonomike, këto shkurtime brutale nuk do të thotë se nevojat e tyre po zhduken", tha Tom Fleçer, nënsekretar i përgjithshëm i KB-së dhe Koordinatori për Raste Urgjente.

 Fondi do të përdoret për të ndihmuar rajonet më të prekura në Afrikë, Azi dhe Amerikën Latine, ku kriza humanitare po rritet. Rreth një e treta e fondeve do të drejtohen në Sudan, ku vitet e luftës civile kanë shkaktuar zhvendosje masive dhe uri. Fonde shtesë do t'i ndahen Çadit, i cili ka pranuar mbi një milion refugjatë sudanezë.

 KB-ja këtë vit  ka kërkuar 45 miliardë dollarë për misionet humanitare, por deri më tani ka marrë vetëm 5 për qind të fondeve të nevojshme, përqindja më e ulët e donacioneve në dekada.

Me këtë ndërhyrje, KB-ja po përpiqet të zbusë pasojat e shkurtimeve drastike të ndihmës ndërkombëtare, të cilat janë rezultat i politikave të reja të SHBA-së, por edhe të donatorëve të tjerë të mëdhenj si Britania e Madhe, të cilët gjithashtu kanë reduktuar financimin e tyre për programet ndërkombëtare humanitare. 

 Foto: Arkivi