Gjenevë, 21 gusht 2025 (MIA) - Komisari i Lartë i Kombeve të Bashkuara për të Drejtat e Njeriut, Folker Turk, tha sot se masat hakmarrëse të SHBA-së kundër institucioneve ndërkombëtare dhe personelit të tyre duhet të ndalen.

Deklarata e tij pasoi sanksionet e reja të SHBA-së dje kundër një gjyqtari francez dhe një kanadez, si dhe dy prokurorëve, në Gjykatën Ndërkombëtare Penale. Administrata e presidentit të SHBA-së, Donald Tramp, e akuzon Gjykatën për politizim. SHBA më parë vendosi sanksione ndaj katër gjyqtarëve dhe një prokurori në Gjykatën Ndërkombëtare Penale.

Turk u bëri thirrje gjithashtu vendeve që të mos zbatojnë sanksionet e SHBA-së dhe të shtojnë përpjekjet për të mbrojtur institucionet e krijuara për të promovuar dhe mbrojtur të drejtat e njeriut dhe sundimin e ligjit.

"Ndëshkimi i gjyqtarëve dhe prokurorëve në nivel kombëtar, rajonal ose ndërkombëtar për përmbushjen e mandatit të tyre në përputhje me normat e së drejtës ndërkombëtare është një sulm ndaj sundimit të ligjit dhe korrupton gjyqësorin", tha Turk.

Ai kërkoi gjithashtu heqjen e sanksioneve kundër të gjithë gjyqtarëve dhe prokurorëve të Gjykatës Ndërkombëtare Penale.

Turk bën thirrje gjithashtu për heqjen e sanksioneve kundër raportueses speciale të emëruar nga Këshilli i të Drejtave të Njeriut për situatën në territoret e pushtuara palestineze, Françeska Albaneze. sa/

foto: EPA