Bruksel, 2 qershor 2025 (MIA) - Bashkimi Evropian mbetet i përkushtuar fuqimisht për zhbllokimin e ndihmës humanitare për Gazën, e cila është bllokuar në kufijtë e Rripit, deklaroi sot përfaqësuesja e lartë e BE-së për Punë të Jashtme dhe Politikë të Sigurisë, Kaja Kallas, në një konferencë të përbashkët për shtyp me ministrin e Punëve të Jashtme të Filipineve, Enrike Manalo në Manila.

"Jemi në kontakt me kolegët tanë në Izrael për ta zhbllokuar atë dhe për të ndihmuar njerëzit, sepse ata financohen kryesisht nga Bashkimi Evropian. Humbja e jetëve është e padurueshme. Vuajtjet e njerëzve duhet të marrin fund dhe ne duhet të bëjmë gjithçka që është në fuqinë tonë për të ushtruar presion", theksoi Kallas.

Ajo shtoi se në nivel evropian ekziston në përputhje për shumë parime të lidhura me konfliktin në Lindjen e Mesme, duke përfshirë dhe mbështetjen për një zgjidhje me dy shtete, përfundimin e armiqësive, një armëpushim të menjëhershëm dhe lirimin e pengjeve.

"Po përpiqemi t'i inkurajojmë palët që të arrijnë atë marrëveshje", theksoi Kallas.

"Ndajmë angazhim për të respektuar rendin ndërkombëtar të bazuar në rregulla, për të promovuar paqen dhe stabilitetin dhe për t'iu përgjigjur së bashku sfidave të përbashkëta. Këto i përfshijnë zhvillimet në Detin e Kinës Jugore dhe luftën e paligjshme të agresionit të Rusisë në Ukrainë", potencoi Kallas. rq/

Foto: ENR