Bruksel, 3 maj 2025 (MIA) – Gjithnjë e më shumë jemi të shqetësuar nga kërcënimet e rritura për gazetarët dhe profesionistët e tjerë të mediave, duke përfshirë frikësime dhe sulme onllajn dhe ofllajn, ndalim arbitrar dhe represion transnacional, të gjitha të drejtuara drejt heshtjes së punës së tyre, porositi përfaqësuesja e lartë e BE-së për punë të jashtme dhe politikë të sigurisë, Kaja Kallas me rastin e Ditës Botërore të Lirisë së Mediave – 3 maji. 

 “Në këtë Ditë Botërore të Lirisë së Mediave, Bashkimi Evropian riafirmon angazhimin e tij të vendosur për të mbrojtur gazetarinë e lirë dhe të pavarur përballë kërcënimeve të pashembullta. Pa lirinë e mediave, e drejta jonë për informacione, liria e të menduarit kritik dhe aftësia për t'i mbajtur njerëzit përgjegjës janë të kompromentuara. Një sektor mediatik i prosperuar, i pavarur dhe pluralist është thelbësor për qëndrueshmërinë dhe mbijetesën e demokracisë. Ne duhet të veprojmë tani për të siguruar të ardhmen e saj”, theksoi Kallas në porosinë e  dërguar në emër të Bashkimit Evropian. 

Kallas thekson se teknologjitë e reja, përfshirë edhe inteligjencën artificiale, mund t’i intensifikojnë rreziqet ndaj mediave dhe gazetarëve me atë që mundësojnë mbikëqyrje gjithëpërfshirëse dhe shqetësim të plotë. 

 “Lufta e Radios Evropa e Lirë këtë vit, si dhe presioni mbi shumë media të tjera në mbarë botën, nënvizojnë rreziqet e mëdha me të cilat përballet media e lirë dhe e pavarur në vitin 2025. Uljet masive të financimit, të përkeqësuara nga rritja e shtypjes politike dhe dhuna në rritje kundër gazetarëve, po e çojnë sektorin e medias në një krizë të thellë”, thotë Kallas. Sipas saj, ndërsa media me interes publik po përpiqet të mbijetojë, regjimet autoritare dhe aktorët e dezinformimit po përpiqen me shpejtësi të mbushin boshllëkun, duke shtrembëruar faktet dhe duke manipuluar opinionin publik.

 “Bashkimi Evropian mbështet përpjekjet jetësore të UNESKO-s për të mbrojtur gazetarët në nivel global, me vëmendje të veçantë ndaj gazetareve gra, të cilat përballen me rreziqe më të mëdha, specifike për gjininë. Të dhënat dhe përpjekjet e UNESKO-s luajnë rol thelbësor në informimin e përgjigjeve efektive të politikave për të adresuar mosndëshkimin e përhapur për krimet kundër gazetarëve”, porosit përfaqësuesja e lartë e BE-së.

Kallasi thekson se mediat e lira dhe të pavarura në të gjithë botën kanë nevojë për mbështetje urgjente dhe vendimtare, sepse pa mbijetesën e tyre do të minohet demokracia, së bashku me sigurinë, mbrojtjen dhe lirinë e qytetarëve. “Bashkimi Evropian mirëpret Parimet e OECD-së për bashkëpunim zhvillimor për mbështetje relevante dhe efektive për mjedisin e mediave dhe informacionit si udhërrëfyesin tonë të përbashkët për forcimin e sistemeve mediatike në mbarë botën. Këto parime duhet të frymëzojnë veprime konkrete dhe transformuese për të rivendosur dhe zgjeruar mbështetjen për gazetarinë e pavarur”, shton Kallas në porosinë me rastin e Ditës Botërore të Lirisë së Mediave - 3 maj. fc/

Foto: Arkivi i MIA-s