Tokio, 20 qershor 2024 (MIA) - Qeveria japoneze sot shprehu shqetësimin e saj për njoftimin e presidentit rus Vladimir Putin se bashkëpunimi në fushën e teknologjisë ushtarake me Korenë e Veriut do të thellohet.

"Ne jemi seriozisht të shqetësuar për deklaratat e Putinit në lidhje me ndikimin e tyre të mundshëm në sigurinë rajonale rreth vendit tonë," tha Sekretari i përgjithshëm i qeverisë japoneze, Joshimasa Hajashi në konferencë për shtyp, njoftoi Agjencia japoneze Kjodo.

Pas bisedimeve me liderin e Koresë së Veriut Kim Xhong Un, Putin i tha Phenianit se "Rusia nuk përjashton zhvillimin e bashkëpunimit ushtarak dhe teknik" me Korenë e Veriut bazuar në marrëveshjen e partneritetit strategjik të nënshkruar dje, duke vënë në dukje se marrëveshja parashikon gjithashtu "ndihmë reciproke në rast agresioni” të njërit prej dy vendeve.

Hajashi tha se blerja e armëve të Koresë së Veriut nga Rusia dhe përdorimi i tyre në pushtimin e Ukrainës përbën një "shkelje të qartë të rezolutave përkatëse të Këshillit të Sigurimit të OKB-së".

Zëdhënësi i qeverisë japoneze, gjithashtu, i kritikoi pretendimet e Putinit se duhet të rishikohet regjimi i sanksioneve të OKB-së kundër Koresë së Veriut, i cili u vendos për shkak të programeve të saj për zhvillim të raketave dhe armëve bërthamore. ls/ 

foto: Arkivi i MIA-s