Tel Aviv, 5 mars 2025 (MIA) - Ministria izraelite e Punëve të Jashtme mbrëmë e ka kritikuar rezolutën e miratuar në samitin e Ligës arabe në Kajro për rindërtimin e Rripit të Gazës, duke vlerësuar se ajo "nuk ka arritur t'i përgjigjet" realitetit pas sulmit të Hamasit në territorin izraelit më 7 tetor të vitit 2023.

Nga ana tjetër, Hamasi e ka përshëndetur planin e miratuar arab për rindërtimin e Gazës dhe bëri thirrje për sigurimin e burimeve financiare për zbatimin e tij.

"Në rezolutë nuk përmendet sulmi dinak terrorist i Hamasit, i cili mori mijëra jetë izraelite, ndërsa qindra njerëz u rrëmbyen. Në të nuk ka kurrfarë dënimi ndaj kësaj organizate terroriste", thuhet në deklaratën e Ministrisë izraelite të Punëve të Jashtme. 

Izraeli e ka rikonfirmuar mbështetjen për planin e presidentit amerikan, Donald Tramp, sipas të cilit popullata palestineze në Gazë duhet të zhvendoset në vendet fqinje, Jordani dhe Egjipt. Sipas autoriteteve izraelite, liderët arabë e refuzuan këtë propozim në takimin në Kajro, pa i dhënë mundësi të zbatohej.

Presidenti egjiptian Abdel Fatah el Sisi njoftoi se vendet arabe mbështesin planin e Egjiptit për rindërtimin e Gazës pas luftës, i cili parashikon popullata dymilionëshe palestineze të mbeten në enklavë.

Projekti prej 53 miliardë dollarësh, i përpunuar në 112 faqe, ka për qëllim të rindërtojë Gazën deri në vitin 2030, pa zhvendosur popullatën e saj.

Në fazën e parë parashikohet pastrimi i mbi 50 milionë tonëve gërmadha dhe heqjen e municioneve të pashpërthyera, të mbetura pas bombardimeve dhe ofensivave ushtarake izraelite. qa/bsh/

Foto: Arkivi