Banjallukë, 11 janar 2023 (MIA) – Kryetari i Partisë për Veprim Demokratik, Bakir Izetbegoviq, për herë të parë që nga viti 2000, nuk do të jetë në asnjë funksion në pushtet në Bosnjë e Hercegovinë.

Pas 23 vitesh, siç raportojnë mediat e Sarajevës, Izetbegoviqi do të jetë vetëm kryetar i Partisë për Veprim Demokratik, sepse sot u konfirmua se nuk do të jetë kandidat për delegat në Dhomën e Popullit të Bosnjë Hercegovinës.

Nga viti 2000 deri në vitin 2002 ai ka qenë deputet në Kuvendin e Kantonit të Sarajevës, nga viti 2002 deri në vitin 2006 ka qenë deputet në Parlamentin e Federatës së BeH-së, ndërsa nga viti 2006 deri në vitin 2010 ka qenë deputet në Parlamentin e BeH-së.

Nga viti 2010 deri në vitin 2018 ka qenë anëtar i Presidencës së BeH-së, ndërsa në mandatin e fundit ka qenë delegat në Dhomën e Popullit të BeH-së.

Partia për Veprim Demokratik sot Për Dhomën e Popullit të BeH-së i propozoi ish-anëtarët e Presidencës së BeH-së, Shefik Xhaferoviq dhe Safet Softiq. Në klubin boshnjak të delegatëve në Dhomën e Popullit të BeH-së, Partia për Veprim Demokratik duhet të ketë dy përfaqësues, një delegat do të jepet nga Fronti Demokratik (DF) i Zheljko Komshiqit, ndërsa edhe dy të tjerë duhet të propozohen nga koalicioni pro-boshnjak “Osmorka”. ar/