Teheran, 19 mars 2026 (MIA) - Ministri i Punëve të Jashtme i Iranit bëri thirrje për vigjilencë dhe koordinim rajonal në bisedime të ndara me homologët e tij nga Turqia, Egjipti dhe Pakistani, ndërsa ushtria paralajmëroi për një përgjigje më të ashpër ndaj çdo sulmi të mëtejshëm ndaj infrastrukturës energjetike të vendit, raportuan mediat shtetërore.

 Pasi  objektet e saj energjetike në fushat e gazit Parsi Jugor dhe Asalue u sulmuan dje, Irani u kundërpërgjigj kundër asaj që i quajti objekte energjetike të lidhura me ShBA-në në vendet e Gjirit, përfshirë qytetin industrial Ras Lafan në Katar, kompleksi më i madh i gazit natyror të lëngshëm në botë.

 "Në bisedimet me kolegët e tij të huaj, Aragçi e vlerësoi sulmin e ShBA-së dhe regjimit sionist (Izraelit) ndaj infrastrukturës iraniane si një akt që synonte përshkallëzimin e tensioneve dhe destabilizimin e rajonit, dhe bëri thirrje për vigjilencë dhe koordinim midis vendeve të rajonit në përgjigje të këtyre kërcënimeve", raportuan sot mediat iraniane.

 Zëdhënësi i Shtabit të Përgjithshëm të Forcave të Armatosura të Iranit deklaroi se sulmet e fundit ndaj infrastrukturës energjetike të vendit kanë çuar në një "fazë të re në luftë" në të cilën Irani ka synuar objektet energjetike të lidhura me ShBA-në dhe investitorët amerikanë në rajon.

 "Nëse sulmet (ndaj infrastrukturës energjetike të Iranit) përsëriten, sulmet e mëtejshme ndaj infrastrukturës suaj energjetike dhe asaj të aleatëve tuaj nuk do të ndalen derisa ajo të shkatërrohet plotësisht, dhe përgjigja jonë do të jetë shumë më e ashpër", tha Ebrahim Zolfaqari.

 Foto: DPA