Gazë, 31 tetor 2023 (MIA) - Zëdhënësi i forcave mbrojtëse izraelite, Daniel Hagari në konferencën e sotme për shtyp theksoi se Hamasi vazhdon ta shfrytëzojë popullatën civile si mburojë  qëllimisht "dhe në mënyrë shumë mizore dhe brutale".

Ai tha se lideri aktual i Hamasit në Gazë Sinvar "nuk kujdeset për njerëzit në Gazë" dhe shtoi se "qëllimisht e ka ndërtuar infrastrukturën e Hamasit nën shtëpitë e njerëzve".

Hagari më pas e përsëriti thirrjen e IDF-së për njerëzit nga pjesa veriore e Rripit të Gazës të nisen drejt jugut. Izraeli e shpalli pjesën veriore të Gazës për zonë evakuimi.

Ai paraprakisht konfirmoi se aeroplanët luftarak izraelitë e kryen sulmin ndaj kampit të refugjatëve Xhabalia në Gazë në të cilin, siç tha, jetën e humbi komandanti i lartë i Hamasit dhe shkaktoi rrënimin e infrastrukturës nëntokësore të Hamasit.

Ai tha se në sulm jetën e humbën edhe disa anëtarë tët jerë të Hamasit të cilët ishin me komandantin dhe "në ndërtesën nën tokë". Hagari informoi se targetimi i ndërtesës çoi drejt rrënimit të ndërtesave të tjera, të cilat, sipas tij, kishin "infrastrukturë mjaft voluminoze".

"Qëllimi i asaj infrastrukture ishte të kryejë aktivitete terroriste kundër forcave tona", theksoi hagari dhe shtoi se "e tërë infrastruktura është rrënuar". ab/

Foto: IDF në Х