Nju-Jork, 21 janar 2024 (MIA) - Sekretari i përgjithshëm i OKB-së, Antonio Guteresh e përsëriti thirrjen e tij për një zgjidhje me dy shtete, ndërsa kryeministri izraelit Benjamin Netanjahu edhe një herë e hodhi poshtë idenë për një shtet sovran palestinez. 

“E drejta e popullit palestinez për të ndërtuar shtetin e tyre duhet të njihet nga të gjithë”, tha Guteresh në Kampala në samitin e Lëvizjes së të painkuadruarve që mbetën neutrale gjatë Luftës së Ftohtë.

"“Refuzimi i zgjidhjes me dy shtete për izraelitët dhe palestinezët dhe mohimi i të drejtës për një shtet për popullin palestinez është i papranueshëm”, theksoi ai.

Guteresh shtoi se refuzimi i zgjidhjes me dy shtete e vazhdon konfliktin që është bërë një kërcënim global për paqen dhe sigurinë, kontribuon në polarizimin dhe forcon ekstremizmin kudo.

Ai i përsëriti thirrjet për armëpushim të menjëhershëm në luftimet midis Izraelit dhe Hamasit në Rripin e Gazës.

Netanjahu hodhi poshtë edhe një herë idenë e një shteti të pavarur palestinez pas përfundimit të luftës në Gazë.

"Edhe SHBA-ja, aleati i rëndësishëm i Izraelit në Lindjen e Afërt, gjithashtu, favorizon një zgjidhje me dy shtete. ls/ 

Foto: Arkivi i MIA-s