Tiranë, 20 nëntor 2025 (MIA) - Gjykata e Posaçme Kundër Korrupsionit dhe Krimit të Organizuar (GJPKO) vendosi sot dy masa sigurie për zëvendëskryeministren dhe ministren e Infrastrukturës dhe Energjisë, Belinda Balluku: "pezullim nga kryerja e detyrës dhe funksionit" dhe "ndalim të daljes nga vendi" si pjesë e hetimeve për shkelje të barazisë në tendera.

"Prokuroria e Posaçme Kundër Korrupsionit dhe Krimit të Organizuar (SPAK) ngriti akuzë kundër Ballukut më 31 tetor, për veprën penale të "Shkeljes së barazisë së pjesëmarrësve në tendera ose ankande publike". Akuzat lidhen me veprimet e ministres Balluku në lidhje me procedurën e prokurimit për "Ndërtimin e Tunelit të Llogarasë", pjesë e segmentit rrugor Orikum-Himarë, në autostradën Vlorë-Sarandë, raportuan mediat.

Sipas SPAK-ut, tenderi në fjalë u zhvillua më 11 dhjetor të vitit 2020, ndërsa pas anulimit të tij, procedura u rihap më 22 qershor të vitit 2021, me një fond të kufizuar prej 18,967,810,952 lekësh (afërsisht 190 milionë euro) pa TVSH.

Pas akuzave të opozitës në seancën e djeshme plenare të Parlamentit të Shqipërisë, Balluku deklaroi se është "e hapur për hetim dhe se nuk do të ketë asnjë reagim derisa çështja të shqyrtohet". sa/

Foto: Balluku FB