Shkup, 15 qershor 2025 (MIA) - Gjithsej 22 persona deri më tani kanë kërkuar ndihmë për t'u larguar nga territori i Izraelit dhe për t'u kthyer në Maqedoninë e Veriut. Bëhet fjalë për shtetas të Maqedonisë së Veriut, si dhe anëtarët e ngushtë të familjeve të tyre, njofton Ministria e Punëve të Jashtme dhe Tregtisë së Jashtme.

Ata shtuan se po zhvillohen aktivitete për evakuimin e tyre të menjëhershëm dhe transferimin në një vend të sigurt, nga ku do të organizohet më tej kthimi i tyre në vend.

"Duam të theksojmë se misioni diplomatik dhe konsullor në Tel-Aviv është në komunikim të vazhdueshëm me qytetarët tanë, ndërsa Ministria e Punëve të Jashtme dhe Tregtisë së Jashtme po punon në mënyrë aktive për të siguruar të gjitha kushtet e nevojshme për kthimin e tyre të sigurt", thuhet në komunikatën e MPJTJ-së.

Paraprakisht, MPJ0ja informoi se në pajtim me gjendjen e përkeqësuar të sigurisë në Lindjen e Afërt, Ministria e Punëve të Jashtme dhe Tregtisë së Jashtme u bën thirrje të gjithë shtetasve të Republikës së Maqedonisë së Veriut të cilët ndodhen në territorin e Izraelit dhe Iranit, nëse u nevojitet ndihmë konsullare, menjëherë të kontaktojnë institucionet kompetente përmes (SOS) telefonave kujdestarë.

Njëherit, siq qëndron në kumtesën e Ministrisë, u bëhet thirrje shtetasve të përmbahen nga udhëtimet drejt vendeve nga ky rajon, deri në përmirësimin e gjendjes së sigurisë.

Për ndihmë dhe asistencë, qytetarët mund të drejtohen në kontaktet e ardhshme: Ambasada e RMV-së në Tel-Aviv - Tel:: +972 54 500 8566 / +972 54 967 0546 Е-posta: telaviv@mfa.gov.mk.

Më tej, Ministria e Punëve të Jashtme dhe Tregtisë së Jashtme Tel: +389 75 273 732 / +389 75 268 736, Е-posta: globalsos@mfa.gov.mk.

Nga atje shtojnë se në kuadër të Ministrisë është formuar shtab krize i cili vazhdimisht e ndjekë gjendjen dhe drejt tij ka qasje 24 orë në ditë për të gjitha nevojat lidhur me ndihmën, mbështetjen dhe asistencën.

"Në fund, edhe njëherë u bëjmë thirrje shtetasve të cilët ndodhen në rajonet e goditura, nëse u nevojitet ndihmë konsullare, pa prolongim t'u drejtohen SOS kontakteve të cekura", qëndron në kumtesën e MPJTJ-së.  mb/

Foto: MIA