Uashington, 15 tetor 2025 (MIA) - Ish komandanti i forcave amerikane në Evropë, gjenerali Ben Hoxhis, paralajmëroi se çdo sulm rus ndaj një anëtari të NATO-s do të shkaktonte përgjigje të menjëhershme dhe shkatërruese.

Në një intervistë për projektin "Vote talk", Hoxhis theksoi se objektet kryesore ushtarake ruse, përfshirë ato në Kaliningrad dhe Sevastopol, do të shkatërroheshin brenda pak orësh nga fillimi i konfliktit.

"Imagjinoni nëse Rusia do ta sulmonte Poloninë në vitin 2025 sipas të njëjtit model si Ukraina. NATO do të reagonte menjëherë. Forcat ajrore dhe tokësore do të shkatërronin trupat ruse. Kaliningradi do të eliminohej në orët e para, nuk do të mbetej asgjë. E njëjta gjë vlen edhe për Sevastopolin", tha Hoxhis duke shtuar se Rusia nuk ka asnjë shans në një konflikt të drejtpërdrejtë me NATO-n.

Gjenerali ka qenë veçanërisht kritik ndaj përgjigjes perëndimore gjatë fillimit të luftës në Ukrainë në vitin 2014, duke thënë se vendet perëndimore ishin shumë të varura ekonomikisht nga burimet ruse të energjisë, gjë që kufizonte vendosmërinë e tyre.

“Shumë njerëz atëherë thonin: "Mos e teproni, Rusia është një vend serioz me armë bërthamore. Nuk dërguam një sinjal të qartë se Kremlini do të mbante përgjegjës për agresionin e tij. Marrëveshjet e Minskut ishin boshe dhe sanksionet nuk patën efekt”, tha Hoxhis.

Sipas tij, në fillim të invazionit rus të Ukrainës në vitin 2022, NATO duhej ta kishte përcaktuar qartë qëllimin, e që është çlirimi i plotë i territorit ukrainas dhe duhej t’i kishte siguruar Kievit të gjitha resurset e nevojshme.

“Nëse kjo do të ishte shpallur menjëherë si qëllim i përbashkët, Ukraina sot do të ishte në një pozicion shumë më të mirë”, është i bindur Hoxhis.

Foto: EPA