Prishtinë, 13 shtator 2024 (MIA) - Policia e Kosovës kumtoi se në bastisjet që u kryen dje në dy objekte të strukturave paralele serbe në Leposaviq, në veri të Kosovës, në një bankë dhe në filialin e Minsitrisë së Financave të Serbisë. janë konfiskuar rreth gjashtë milionë denarë serbë dhe dhjetëra mijë dollarë dhe euro, lajmëroi korerspondenti i MIA-s nga Prishtina.

Në raportin 24-orësh të policisë thuhet se në rastin, i cili është prëshkruar si "larje parash dhe keqpërdorim i autorizimeve ekonomike", janë konfiskuar edhe disa vula dhe dokumente, të cilat, sipas policisë, e dëshmojnë punën e paligjshme të atyre institucioneve.

"Lidhur me rastin, me 12.09.2024 njësitet policore kanë kryer kontroll në dy lokacione, nën dyshimin se institucionet financiare kanë kryer veprat e cekura. Gjatë bastisjes janë sekuestruar; 5,772 313.00- dinarë serb, 57,626.00-dollarë amerikan, 10,835.00-euro, 2,790.00 franga zvicerane, dy shtëpiza kompjuteri dhe dy DVR të kamerave të sigurisë. Po ashtu janë sekuestruar edhe disa vula dhe dokumente të ndryshme që dëshmojnë operimin e kundërligjshëm të këtyre institucioneve", thuhet në raportin e policisë.

Lidhur me rastin "të gjitha veprimet janë kryer në konsultim e koordinim me prokurorin e shtetit", thuhet në raport.

Bastisjen dje e konfirmoi edhe zëvendësdrejtori i policisë për veriun, Veton Elshani.

"Me urdhëresë të Gjykatës në Mitrovicë, po bastisen lokalet e Bankës Popullore të Serbisë, dega në Kosovë dhe Drejtoria e Thesarit, Ministria e Financave në Leposaviq. Krimet Ekonomike janë duke hetuar një rast të pastrimit të parave që ka pasur lidhje me bankat më herët", tha Elshani.