Strasburg, 8 tetor 2025 (MIA) - Diçka e re dhe e rrezikshme po ndodh në qiellin tonë, ku vetëm dy javët e fundit me aeroplanë luftarakë MiG shkelën hapësirën ajrore të Estonisë, ndërsa dronë fluturuan mbi vende kritike në Belgjikë, Poloni, Rumani, Danimarkë dhe Gjermani, tha kryetarja e Komisionit Evropian, Ursula fon der Lajen në fjalimin e saj para eurodeputetëve në Strasburg gjatë debatit kushtuar reagimit të BE-së ndaj çrregullimit të fundit të hapësirës ajrore ruse dhe kërcënimeve ndaj infrastrukturës kritike të shteteve anëtare të bllokut.

"Të mos mashtrohemi. Kjo është pjesë e një modeli shqetësues të kërcënimeve në rritje. Kabllot nënujore po priten në gjithë Unionin tonë, aeroportet dhe qendrat logjistike po paralizohen nga sulmet kibernetike, ndërsa zgjedhjet janë cak i fushatës me ndikim dashakeq", theksoi Fon der Lajeni.

Sipas saj, këto incidente nuk paraqesin shqetësim të rastësishëm, por janë planifikuar si pjesë e një "fushate koherente dhe përshkallëzuese" për të shqetësuar qytetarët evropianë, për të testuar vendosmërinë e Evropës, për të përçarë Unionin dhe për të dobësuar mbështetjen e saj për Ukrainën.

"Është koha ta quajmë me emrin e saj të duhur. Është një luftë hibride dhe duhet ta marrim shumë seriozisht", theksoi Fon der Lajen, duke shtuar se Evropa duhet t'i përgjigjet asaj dhe të mbrojë çdo centimetër katror të territorit të saj.

Kryetarja e KE-së akuzoi Rusinë se dëshiron të mbjellë përçarje midis shteteve anëtare të BE-së dhe për këtë arsye, sipas saj, ato duhet të përgjigjen me veprime uniteti dhe solidariteti.

"Por ne jo vetëm që duhet të reagojmë, por duhet edhe të pengojmë, sepse nëse hezitojmë të veprojmë, zona gri vetëm se do të zgjerohet", shtoi Fon der Lajen.

Ajo theksoi se misioni kryesor i BE-së është ruajtja e paqes dhe për këtë qëllim sot duhet të ketë kapacitetin për të penguar agresionin dhe të përgjigjet ndaj provokimeve, si dhe duhet të jetë në gjendje të reagojë në kohë reale.

"Asgjë nga kjo nuk është e mundur pa një industri të fortë mbrojtëse evropiane. Duhet të mbështetemi në bazën tonë industriale, veçanërisht në kohë kritike", tha Fon der Lajen.

Foto: Parlamenti evropian