Bruksel, 30 nëntor 2024 (MIA) - Shumica e qytetarëve të Maqedonisë së Veriut, ose 56 për qind, kanë besim në Bashkimin Evropian, tregojnë rezultatet e hulumtimit të vjeshtës të Eurobarometrit për vitin 2024.

Qytetarët e Bosnjës dhe Hercegovinës shprehin të njëjtin nivel besimi ndaj BE-së si qytetarët e Maqedonisë. Ndër vendet e tjera kandidate për anëtarësim, besimi në BE është më i lartë në Shqipëri me 81 për qind, përpara Malit të Zi me 75, Kosovës me 70 dhe Gjeorgjisë me 58 për qind. Moldavët shprehin besim më të ulët në BE sesa qytetarët e Maqedonisë, me 52 për qind, që megjithatë tregon se shumica e qytetarëve të Moldavisë, si dhe të vendeve të tjera kandidate të përmendura, besojnë në Union.

Besim më të ulët në BE prej 50 përqindëve kanë qytetarët e Turqisë edhe atë me 42 për qind dhe qytetarët e Serbisë me 38 për qind. Megjithatë, këto të dhëna përfaqësojnë gjithashtu një rritje të besimit në BE me katër për qind në Turqi dhe me dy për qind në Serbi krahasuar me anketën e pranverës së këtij viti.

Besim në BE shprehin edhe 38 për qind e banorëve të Britanisë së Madhe, që paraqet një rritje prej gjashtë për qind.

Kur bëhet fjalë për qytetarët e BE-së, shumica e tyre ose 51 përqind besojnë në Union, i cili përfaqëson nivelin më të lartë të matur të besimit të evropianëve drejt bllokut në 17 vitet e fundit.

Sipas këtyre të dhënave, mbështetja e evropianëve për euron është në një rekord të lartë, ata kanë një pamje më optimiste për të ardhmen dhe dëshirojnë të shohin një BE më të fortë dhe më të pavarur, veçanërisht përballë sfidave aktuale globale. Të rinjtë evropianë nga mosha 15 deri në 24 vjeç shprehën mbështetjen më të madhe për BE-në, ose 59 për qind e të anketuarve.

Të njëjtën mbështetje si për BE-në evropianët me 51 për qind shprehin edhe për Komisionin Evropian, i cili është në nivelin më të lartë që nga viti 2007.

Pothuajse tre të katërtat e të anketuarve ose 74 përqind e qytetarëve të vendeve anëtare të BE-së thanë se ndjehen si qytetarë të BE-së, që është niveli më i lartë në më shumë se dy dekada, ndërsa 61 për qind e evropianëve janë optimistë për të ardhmen e BE-së.

Pothuajse shtatë nga dhjetë të anketuar ose 69 për qind pajtohen se BE-ja ka fuqi dhe instrumente të mjaftueshme për të mbrojtur interesat ekonomike të Evropës në ekonominë globale, dhe e njëjta përqindje pajtohet se Bashkimi Evropian është një vend stabiliteti në botën e sotme të trazuar.

Një e treta e evropianëve ose 33 për qind besojnë se prioriteti kryesor i veprimit të BE-së në afat të mesëm duhet të jetë siguria dhe mbrojtja, 29 për qind duhet të jetë migrimi, 28 për qind ekonomia dhe mjedisi dhe 27 për qind shëndeti. Në të njëjtën kohë, 44 për qind e qytetarëve evropianë besojnë se sigurimi i paqes dhe stabilitetit do të ketë ndikimin më të lartë pozitiv në jetën e tyre në afat të shkurtër, e ndjekur nga sigurimi i ushqimit, kujdesi shëndetësor dhe furnizimet industriale, si dhe përballja me migracionin me nga 27 për qind.

Kur bëhet fjalë për fusha specifike për veprim të BE-së në fushën e mbrojtjes së mjedisit, 38 përqind e evropianëve besojnë se përparësi duhet t'i jepet përdorimit të energjisë nga burimet e rinovueshme, 31 për qind investimeve në bujqësi të qëndrueshme dhe 28 për qind në ndërtimin e infrastrukturës energjetike dhe investimin në teknologji të pastër.

Sondazhi regjistroi mbështetjen më të lartë për monedhën e përbashkët evropiane deri më tani, e cila është 74 për qind në nivelin e të gjithë BE-së dhe 81 për qind vetëm në Eurozonë. Kur bëhet fjalë për perceptimin e gjendjes së ekonomisë evropiane, 48 për qind e evropianëve mendojnë se është e mirë, ndërsa 43 për qind mendojnë se është e keqe.

Rreth 76 për qind e të anketuarve evropianë besojnë se pushtimi rus i Ukrainës përbën një kërcënim për sigurinë e BE-së.

Nga atje, 87 për qind e të anketuarve pajtohen me ofrimin e mbështetjes humanitare për njerëzit e prekur nga lufta në Ukrainë, 71 për qind mbështesin sanksionet ekonomike kundër qeverisë ruse, kompanive dhe individëve dhe 68 për qind pajtohen me ofrimin e mbështetjes financiare për Kievin. Rreth 60 përqind e evropianëve miratojnë që BE-ja t'i japë Ukrainës statusin e kandidatit dhe 58 përqind janë dakord që Unioni duhet të financojë blerjen dhe furnizimin e vendit me pajisje ushtarake.

Ky sondazh i Eurobarometrit të vjeshtës u krye midis 10 tetorit dhe 5 nëntorit në 27 shtetet anëtare të BE-së, në nëntë nga vendet kandidate dhe kandidate potenciale për anëtarësim në BE (të gjitha përveç Ukrainës), si dhe në Britaninë e Madhe. Vetëm në BE me anketën janë përfshirë 26.525 qytetarë. mb/

Foto: MIA