Kajro, 20 gusht 2024 (MIA) - Egjipti bëri thirrje për armëpushim në Gazë dhe paralajmëroi mundësinë e zgjerimit të konfliktit në një luftë rajonale. Deklaratën e dha presidenti i Egjiptit, Abdel Fatah al-Sisi pas takimit me sekretarin amerikan të Shtetit, Entoni Blinken.

"Armëpushimi në Gazë duhet të jetë fillimi i njohjes më të gjerë ndërkombëtare të shtetit palestinez dhe zbatimi i zgjidhjes me dy shtete, sepse është një garantues themelor i stabilitetit në rajon", deklaroi Sisi gjatë takimit të tij në Kajro. 

"Ka ardhur koha për t'i dhënë fund kësaj lufte dhe për t'iu qasur asaj me mençuri, duke respektuar gjuhën e paqes dhe diplomacisë, shtoi ai, duke theksuar se të gjitha palët duhet të jenë të vetëdijshme për "rrezikun e zgjerimit të konfliktit në nivel rajonal".

Blinkeni ishte në kryeqytetin egjiptian për të diskutuar mundësinë e përparimit në negociatat për një armëpushim në Gazë dhe një marrëveshje për lirimin e të burgosurve, që planifikohen më së voni këtë javë, megjithëse mbeten mosmarrëveshje të konsiderueshme.

Ndërkohë, kryeministri izraelit Benjamin Netanjahu u tregoi familjarëve të të rrëmbyerve në Gazë se nuk është "i sigurtë" nëse do të ketë armëpushim, raporton portali izraelit Walla. 

"Nuk jam i sigurt se a do të ketë marrëveshje, por nëse ka, ajo do të jetë ashtu që do të ruaj interesat strategjike të Izraelit", deklaroi Netanjahu në takimi e sotëm me familjarët e personave të cilët grupi palestinez Hamas i rrëmbeu nga Izraeli. qa/

Foto: EPA