Port-O-Prens, 1 prill 2025 (MIA) - Anëtarët e një prej bandave të shumta të Haitit kanë sulmuar një burg në qytetin qendror të Mirebalais dhe kanë liruar rreth 500 të burgosur.

Zëdhënësi i policisë nacionale tha se forca policore shtesë janë sistemuar në qytet, që gjendet 50 kilometra në verilindje të kryeqytetit Port-O-Prens.

Policia kumtoi se sërish e ka marrë kontrollin ndaj Mirebalis, por raportet lokale paralajmërojnë se shumica e refugjatëve ende janë në rrugë.

Grupet e armatosura kontrollojnë pothuajse të gjithë kryeqytetin, por ky sulm i fundit sugjeron se ata po synojnë gjithnjë e më shumë qytete në pjesë të tjera të vendit, shkruan Bi-Bi-Si.

Mirebalais gjendet në udhëkryqiin e dy rrugëve kryesore - njëra çon në veri drejt bregut, ndërsa tjetra në lindje drejt Republikës Domenikane.

Banorët raportuan se sulmuesit e armatosur rëndë qëlluan mbi ndërtesa dhe kalimtarë dhe u vunë flakën ndërtesave dhe makinave, duke shkaktuar panik në popullatën lokale.

Sulmuesit e kanë sulmuar edhe stacionin policor vendor dhe kanë hyrë në burg ku ishin rreth 500 njerëz, duke i liruar të arrestuarit.

Një gazetar i radios lokale tha se sulmi u krye nga dy grupe - 400 nga "Mavozo" dhe një grup që e quan veten "Taleban" - të dyja pjesë e koalicionit më të gjerë Viv Ansam, i cili kontrollon pjesët veriore të Port-o-Prens.

Supozohet se të dy grupet tentojnë ta marrin kontrollin ndaj rrugëve kyçe të cilat çojnë nga zonat e tyre drejt brendësisë së vendit. sa/

foto: EPA