Kopenhagë, 27 gusht 2025 (MIA) - Shefi i diplomacisë daneze, Lars Loke Rasmunsen urdhëroi diplomatin më të lartë në ambasadën e SHBA-së në Kopenhagë të paraqitet për një bisedë për shkak të raporteve se qytetarët amerikan kanë kryer operacione për ndërhyrje në punët e brendshme të Grenlandës, raportoi sot televizioni publik danez DR, duke cituar ministrin. 

Presidenti amerikan, Donald Tramp, deklaroi se dëshiron që SHBA-të të marrin nën kontroll ishullin arktik të pasur me minerale dhe të vendosur strategjikisht për arsye që lidhen me sigurinë kombëtare dhe ndërkombëtare dhe nuk e përjashtoi përdorimin e forcës për realizimin e këtij qëllimi.

Qeveria daneze beson se të paktën tre qytetarë amerikan të lidhur me administratën e Trampit ishin përfshirë në operacionet e fshehta për zgjerimin e ndikimit në territorin danez, njoftoi DR, duke cituar burime anonime. 

Televizioni nuk i identifikoi personat. 

"Çdo tentim për ndërhyrje në punët e brendshme të mbretërisë daneze sigurisht do të jetë e papranueshme", deklaroi ministri Rasmusen për DR. 

"Në këtë kuptim, i kërkova Ministrisë së Punëve të Jashtme të ftojë për një bisedë të ngarkuarin me punë (diplomatin) amerikan", tha ministri.

Misionin e SHBA-së në Kopenhagë aktualisht e udhëheqë ushtruesi i detyrës ambasadori Mark Stroh. qa/

Foto: EPA