Frankfurt, 24 korrik 2025 (MIA) - Banka Qendrore Evropiane (BQE) ka konfirmuar normat aktuale të interesit në eurozonë, duke shënuar një pauzë në uljen e kostove të huamarrjes, me një paralajmërim se ndërprerjet në zinxhirët globalë të furnizimit mund të kufizojnë kapacitetet prodhuese të kompanive dhe të nxisin inflacionin.

Norma e interesit për rifinancimin bankar do të mbetet në 2.15 për qind, dhe norma e interesit për depozitat njëditore në banka do të mbetet në 2.0 për qind. Për kreditë njëditore, bankat tregtare do të vazhdojnë të paguajnë interes prej 2.4 për qind, citohet në kumtesën e BQE-së.

Banka ka bërë pauzë në uljen e shpenzimeve për financim, për herë të parë pothuajse pas një viti, kur gjithashtu i mbajti normat e interesit në nivelin e tyre aktual.

Inflacioni në eurozonë u rrit pak në qershor, për 2 për qind, duke sinjalizuar një rritje të qëndrueshme të çmimeve, sipas definicionit të BQE-së. Ushqimet dhe shërbimet u rritën ndjeshëm, ndërsa çmimet e energjisë ranë pak, njoftoi Enti Evropian i Statistikave.

Presionet mbi çmimet janë dobësuar më tej, përfundoi Bordi Drejtues i BQE-së, duke vënë në dukje gjithashtu një rritje më të butë të pagave.

Inflacioni duhet të jetë mesatarisht dy përqind gjatë gjithë vitit 2025, parashikoi BQE në qershor.

Ekonomia në zonën e zbatimit të valutës së përbashkët evropiane deri më tani ka treguar qëndrueshmëri ndaj "mjedisit sfidues global", përfunduan ata, duke paralajmëruar megjithatë për "pasiguri të jashtëzakonshme" të vazhdueshme, kryesisht për shkak të mosmarrëveshjeve tregtare.

Rritja e aktivitetit ekonomik i tejkaloi pritjet në tremujorin e parë, pjesërisht sepse kompanitë përshpejtuan dërgesat në pritje të tarifave më të larta, por edhe sepse konsumi i amvisërive u forcua.

Kompanitë gjithashtu investuan më shumë në fillim të vitit, por tani hezitojnë për shkak të rritjes së tarifave dhe pritjeve se ato do të rriten, thuhet në kumtesën e mbledhjes së BQE-së.

Investimet pengohen gjithashtu nga një euro më e fortë dhe pasiguria gjeopolitike, shtohet.

Kushtet më të lehta të financimit po mbështesin kërkesën e brendshme, duke përfshirë tregun e patundshmërive, ndërsa rritja ekonomike me kalimin e kohës duhet të nxisë edhe investimet e përforcuara shtetërore në mbrojtje dhe infrastrukturë.

Theksohet se është thelbësore që të forcohet urgjentisht eurozona dhe ekonomia në mjedisin aktual gjeopolitik dhe rekomandohet që qeveritë të mbështesin masa që forcojnë produktivitetin, konkurrueshmërinë dhe qëndrueshmërinë.

Perspektiva e inflacionit aktualisht mbart më shumë pasiguri se zakonisht, për shkak të luhatjeve të shpeshta në politikën tregtare në të gjithë botën. sa/

Foto: MIA