Kiev, 1 prill 2025 (MIA) - Rreth 73 për qind e ukrainasve besojnë se presidenti i SHBA-së, Donald Trampi nuk është i mirë për Ukrainën, që është një rritje e madhe nga dhjetori i vitit 2024, kur vetëm 21 për qind e vlerësuan negativisht, tregon hulumtimi i Institutit Ndërkombëtar të Sociologjisë së Kievit (KMIS) të publikuar sot.

"Dhjetorin e kaluar, pasi Trampi u rizgjodh, por para se të merrte detyrën, 54 për qind e ukrainasve besonin se presidenti i ri amerikan do të kishte një ndikim pozitiv në Ukrainë. Vetëm 19 për qind menduan kështu në mars", publikoi KMIS. 

 Midis 12 dhe 22 marsit, 55 për qind e ukrainasve thanë se prisnin një marrëveshje paqeje mjaft ose plotësisht të padrejtë nga Trampi, një rënie e lehtë nga 58 përqind midis 14 shkurtit dhe 4 marsit, por një rritje të konsiderueshme nga 31 për qind në dhjetor. Në të njëjtën kohë, në dhjetor të vitit 2024, 23 për qind e ukrainasve shprehën besimin se Trampi do të sillte një paqe të drejtë, ndërsa 11 për qind e tyre e morën këtë pozicion midis 14 shkurtit dhe 4 marsit dhe 18 për qind midis 12 dhe 22 marsit", raportuan mediat ukrainase.

Hulumtimi thekson se ukrainasit tani e shohin Evropën si një aleat më të besueshëm se SHBA-në, ndërsa 64 për qind të të anketuarve mendojnë se partnerët evropianë duan që Ukraina të arrijë paqen nën kushte të pranueshme, ndërsa vetëm 24 për qind e të anketuarve e kanë këtë mendim për SHBA-në. 

 Më shumë se 50 për qind e ukrainasve i kritikojnë përpjekjet e presidentit amerikan Donald Tramp për paqe dhe kanë frikë se ato ka të ngjarë të çojnë në një fund pjesërisht ose plotësisht të padrejtë të luftës së Rusisë kundër vendit të tyre, tregon anketa e  fundit nga Instituti Ndërkombëtar i Sociologjisë në Kiev.

Sipas rezultateve të anketës 1326 persona nga territori i Ukrainës, 32 për qind e të anketuarve kanë thënë se presin "një paqe mjaft të padrejtë, megjithëse me përmbushjen e disa kërkesave të Ukrainës", ndërsa 22 për qind thanë se presin "një paqe krejtësisht të padrejtë". 

 Vetëm tre për qind e të anketuarve thanë se besojnë se Tramp mund të arrijë një paqe të drejtë, ndërsa 15 për qind thanë se presin "një paqe mjaft të drejtë, me disa lëshime për Rusinë".

Numrat sugjerojnë se ukrainasit janë bërë më pak optimistë për përpjekjet e Trampit për t'i dhënë fund luftës në Ukrainë që kur ai mori detyrën në janar. 

 Foto: DPA