Bruksel, 20 korrik 2023 (MIA) - Vendet anëtare të BE-së miratuan një pozicion të përbashkët për veçoritë e sigurisë që duhet t'i përmbajnë produktet digjitale sipas Ligjit Evropian të Sigurisë Kibernetike.

Në takimin e Komitetit të përfaqësuesve të qeverive të vendeve anëtare të BE-së (KOREPER) është arritur marrëveshje për karakteristikat e sigurisë dhe kërkesat që duhet t'i plotësojnë produktet me komponente digjitale, siç janë kamerat shtëpiake dhe pajisjet e mençura për amvisëri, televizorë dhe lodra për fëmijë, para se të lëshohen në shitjen në tregun e Unionit.

Sekretari shtetëror spanjoll për digjitalizim dhe inteligjencë artificiale, Karme Artigas Brugal, vendi i të cilit është kryesues aktual me Unionin, vlerësoi se marrëveshja e arritur "e promovon përkushtimin e BE-së për sigurimin e tregut të vetëm të sigurt digjital.

"Ky është një moment historik i rëndësishëm për presidencën spanjolle dhe ne mezi presim të fillojmë negociatat me Parlamentin sa më shpejt të jetë e mundur", tha Artigas Brugal.

Siç njofton raportuesi special i MIA-s nga Brukseli, rregullat e harmonizuara paraqesin kërkesa të detyrueshme lidhur me sigurinë kibernetike në dizajnimin, zhvillimin, prodhimin dhe tregtimin e produkteve harduerike dhe softuerike në tregun evropian.

Angazhimi për arritjen e rregullave të vetme në nivel të Unionit është për të shmangur mbivendosjen e kritereve që mund të rezultojnë nga ligjet e ndryshme që lidhen me këtë sferë në vendet anëtare të BE-së.

Pajisjet e digjitalizuara, sipas marrëveshjes, do të duhet të plotësojnë një nivel të caktuar të sigurisë kibernetike kur të shiten në territorin e BE-së, gjë që do të sigurojë mbrojtje efektive të kompanive, institucioneve dhe familjeve nga kërcënimet kibernetike.

Propozimi synon të plotësojë boshllëqet dhe ta bëjë Ligjin e Sigurisë Kibernetike më të qëndrueshëm, duke siguruar që produktet me komponentë digjitalë të jenë të sigurt për t'u përdorur, ndërkohë që ndihmon konsumatorët të marrin vendime adekuate kur blejnë produkte harduerësh dhe softuerësh.

Këto rregulla nuk do të zbatohen për pajisjet mjekësore, aeroplanët dhe automjetet, pasi ato tashmë kanë disa kërkesa të sigurisë kibernetike të përcaktuara në rregulloret ekzistuese të BE-së.

Rregullat e harmonizuara të KOREPER kanë ruajtur në thelb qasjen e përgjithshme të propozimit të iniciuar nga Komisioni Evropian, i cili përcakton përgjegjësinë e prodhuesve për të siguruar përputhjen e produkteve me kërkesat e sigurisë digjitale, duke përfshirë vlerësimin e rrezikut të sigurisë kibernetike, deklaratën e pajtueshmërisë, si dhe bashkëpunimin me autoritetet kompetente.

Propozimi bazë i KE-së në seancën e KOREPER-it u plotësua me amendamente, të cilat ndër të tjera parashikojnë që incidentet ose lëshimet e mundshme me pajisjet digjitale  të raportohen tek autoritetet kompetente të shteteve anëtare dhe jo tek Agjencia për Sigurinë Kibernetike të Bashkimit Evropian (ENISA), për të krijuar një platformë të vetme për shkëmbimin e informacionit, për deklarimin e prodhimeve digjitale për të përmbajtur elemente për caktimin e shekullit të tyre të kohëzgjatjes, si dhe të sigurohen masa për mbështetje të ndërmarrjeve të vogla dhe mikro.

Me arritjen e marrëveshjes në suaza të KOREPER hapet rruga që kryesia spanjolle të inicojë negociata me Parlamentin Evropian për konfirmimin e versionit përfundimtar të rregullores së propozuar ligjore.  sa/

Foto: Arkivi i MIA-s