Uashington, 6 nëntor 2025 (MIA) - Administrata e presidentit Donald Tramp ka revokuar rreth 80,000 viza jo-imigruese që nga marrja e detyrës më 20 janar për vepra penale që variojnë nga drejtimi i makinës në gjendje të dehur deri te sulmi dhe vjedhja, tha një zyrtar i lartë i Departamentit të Shtetit.

Shkalla e revokimit të vizave, e raportuar për herë të parë nga "Uashington Egzaminer", pasqyron një goditje të gjerë ndaj imigracionit që filloi me inaugurimin e Trampit, në të cilën një numër i paparë emigrantësh, përfshirë ata me viza të vlefshme, janë deportuar.

Administrata gjithashtu miratoi politika më të rrepta për vizat, me kontrolle më të rrepta të mediave sociale dhe kontrolle të zgjeruara të biografisë.

Rreth 16,000 nga vizat e revokuara lidheshin me drejtimin e automjetit nën ndikimin e alkoolit, ndërsa rreth 12,000 ishin për sulm dhe 8,000 të tjera ishin për vjedhje.

"Këto tre krime përbëjnë pothuajse gjysmën e vizave të revokuara këtë vit", tha një zyrtar i lartë i Departamentit të Shtetit, duke folur në kushte anonimiteti.

Në gusht, një zëdhënës i Departamentit të Shtetit tha se Uashingtoni kishte revokuar më shumë se 6,000 viza studentore për tejkalim të afatit të qëndrimit dhe shkelje të tjera të ligjit, përfshirë një numër të vogël për "mbështetje të terrorizmit".

Muajin e kaluar, Departamenti i Shtetit tha gjithashtu se kishte revokuar vizat e të paktën gjashtë personave për shkak të komenteve në mediat sociale në lidhje me vrasjen e aktivistit konservator Çarli Kirk.

Sekretari i Shtetit i SHBA-së, Marko Rubio, tha në maj se kishte revokuar vizat e qindra, ndoshta mijëra njerëzve, përfshirë studentë, për përfshirje në aktivitete që ai tha se ishin në kundërshtim me prioritetet e politikës së jashtme të SHBA-së.

Direktivat e Departamentit të Shtetit këtë vit u udhëzojnë diplomatëve amerikanë jashtë vendit të jenë të kujdesshëm ndaj çdo kandidati që Uashingtoni mund ta konsiderojë armiqësor ndaj SHBA-së dhe me një histori aktivizmi politik.

Zyrtarët e administratës së Trampit kanë thënë se mbajtësit e vizave studentore dhe kartave të gjelbra janë subjekt i deportimit për shkak të mbështetjes së tyre për palestinezët dhe kritikave ndaj sjelljes së Izraelit në luftën e Gazës, duke i quajtur veprimet e tyre një kërcënim për politikën e jashtme të SHBA-së. sa/

foto: MIA arkivi