Скопје, 20 април 2026 (МИА) - Претседателот на Собранието, Африм Гаши, денеска оствари проштална средба со Фаисал Гази Исмаил Хифзи, нерезидентен амбасадор на Кралството Саудиска Арабија со седиште во Тирана - соопштија попладнево од собраниската прес-служба.

- Претседателот Гаши му оддаде признание на амбасадорот за неговиот личен ангажман и дипломатски вештини, со што значително придонел за зајакнување на мостовите меѓу двете пријателски земји. Тој истакна дека во иднина очекува да продолжи процесот на отворање резидентни амбасади во Скопје и Ријад, што ќе претставува историски чекор напред за меѓусебните билатерални односи - пишува во соопштението.

Гаши ја поздравил клучната и конструктивна улога на Кралството Саудиска Арабија во новата и комплексна геополитичка реалност на Блискиот Исток и истакнал дека високо ја цени нивната политиката за деескалација, дијалог и изнаоѓање одржливи решенија за мирот во регионот.

- Амбасадорот Исмаил Хифзи потенцира дека интензивно работел на продлабочување на економските врски и поттикнување на интересот за саудиски инвестиции на македонскиот пазар, како и за јакнење на односи меѓу двете држави со размена на посети на високо ниво. Двајцата соговорници се согласија дека е потребно унапредување на меѓусебната соработка во сферите на културата, образованието и туризмот, што ќе значи уште поголемо запознавање и зајакнување на соработката меѓу двете држави - се додава во соопштението. бд/вј/

Фото: Собраниска прес-служба