Uashington, 21 gusht 2025 (MIA) - Uragani Erin ka goditur bregun e Karolinës së Veriut me erëra të fuqishme dhe valë të cilat kanë përmbytur një pjesë të një autostrade kryesore dhe kanë kërcënuar shtëpitë në plazh. Parashikuesit e motit parashohin që stuhia sot do të arrijë kulmin, me mundësinë e përsëritjes së një kategorie më të madhe tre ose më të lartë.

Megjithatë, sipas parashikimeve, nuk duhet të godasë tokën në mënyrë të drejtpërdrejtë, por të kthehet drejt detit të hapur.

Qendra kombëtare e uraganeve kumtoi se priten kushte stuhie tropikale në pjesë të Karolinës së Veriut dhe Virxhinias. Paralajmërimi për det të trazuar është lëshuar deri nesër, ndërsa Nju-Jorku, Nju Xhersi, Merilend dhe Delaver kanë ndaluar përkohësisht notin në plazhe për shkak të rrymave dhe valëve të rrezikshme.

Në afërsi të Masaçusetsit, ishulli i Nantaketit mund të goditet nga valët deri në tre metra të larta.

Në Karolinën e Veriut, uji mbuloi rrugën kryesore që lidh ishujt. Autostrada e ishullit Hateras u mbyll mbrëmë, ndërsa shërbimi i trageteve për në Ishullin Okrakok u ndërpre.

Nënpunësit paralajmërojnë se baticat e larta do të izolojnë fshatrat dhe do të kërcënojnë shtëpitë përgjatë bregdetit. Edhe pse autoritetet urdhëruan evakuime në Hateras dhe Okrakok, shumë banorë vendosën të qëndrojnë në vend. Më shumë se dhjetëra persona u shpëtuan nga plazhi Rajtsvil në Karolinën e Veriut të martën, krahasuar me më shumë se 80 nga një ditë më herët.

"Edhe ata të cilët mendojnë se dinë si të përballen me rrymat e fuqishme, ende po e vënë jetën e tyre në rrezik", paralajmëron meteorologu Bob Oravec.

Herët në mëngjes, Erin ruajti forcën e uraganit të kategorisë 2, me erëra deri në 102 milje në orë. Ekspertët theksojnë se ndryshimi i klimës dhe ngrohja e detërave po rrisin rrezikun e uraganeve që forcohen me shpejtësi dhe shkaktojnë kaos në bashkësitë bregdetare. rq/

Foto: arkivi i EPA-s