Sofje, 24 nëntor 2022 (MIA) – Ministria bullgare e Punëve të Jashtme në mënyrë kategorike e dënoi, siç thuhet, veprën penale serioze në të cilën ishte përdorur armë zjarri mbi Klubin bullgar "Borisi i Tretë" dje në Ohër, Republika e Maqedonisë së Veriut. Siç njofton korrespondenti i MIA-s nga Sofja, sipas publikimit të Ministrisë, konsulli i përgjithshëm bullgar në Manastir, Dimitar Ivanov ka qenë për vizitë në Ohër dhe vendosi kontakt me anëtarët e shoqatës dhe institucionet kompetente në qytet të involvuar në rastin. Kjo vepër penale është sulmi i tretë mbi klubin Mbreti Borisi i Tretë për më pak se dy muaj. Sulmi paraprak u krye vetëm para dy ditësh, për çka Ministria e Punëve të Jashtme i dërgoi notë verbale ambasadës së Maqedonisë së Veriut në Sofje. Ministria bullgare e Punëve të Jashtme e ka parë reagimin e Ministrisë së Punëve të Jashtme të Maqedonisë së Veriut, por potencohet, në mënyrë kategorike nuk pranojmë veprat e tilla të rënda penale të definohen si akt vandal. Autoritetet në Sofje, siç transmeton korrespondenti i MIA-s, presin që organet kompetente në Republikën e Maqedonisë së Veriut sa më parë të ndërmarrin masa për t'i zbuluar dhe për t'i nxjerrë para drejtësisë autorët e krimit mbi klubin Mbreti Borisi i Tretë. Me këtë rast, sot në Ministrinë e Punëve të Jashtme të Bullgarisë, në takim do të thirret ambasadorja e Maqedonisë së Veriut, Agnesa Rusi-Popovska, të cilës do t'i dorëzohet notë proteste. Ministria e Punëve të Jashtme e Republikës së Maqedonisë së Veriut e dënoi ashpër dëmtimin e dritares së Klubit bullgar “Borisi i Tretë” në Ohër që ndodhi dje, duke e cilësuar si akt vandal. “Ngjarjet e këtilla janë plotësisht të papranueshme dhe janë në dobi të atyre të cilët janë kundër avancimit të marrëdhënieve të mira fqinje ndërmjet dy vendeve dhe qëllimi i të cilëve është që të minohet integrimi evropian i vendit”, thuhet në reagimin e MPJ-së. nk/shk/