Prishtinë, 7 shtator 2024 (MIA) - Presidentja e Kosovës, Vjosa Osmani pas zbulimit të shtatores së Ibrahim Rugovës në Podujevë ka folur për protestat e serbëve në pikat kufitare që lidhin Kosovën e Serbinë, ku tha se prapa bllokadave në pikat kufitare me Kosovën, qëndron shteti serb.

"Në kundërshtim me të gjitha marrëveshjes e Brukselit të cilat janë arritur në këto 12 vite, Serbia edhe njëherë tregon se nuk i intereson lëvizja e lirë, fqinjësia e mirë, përkundrazi ajo po vazhdon të shfrytëzojë banda kriminale për të kryer sulme të vazhdueshme ndaj Kosovës dhe ndaj lëvizjes së lirë. Këto bllokada të cilat janë krijuar kohëve të fundit, të cilat në mënyrë të veçantë kanë për qëllim të terrorizojnë qytetarët shqiptarë donin t’i shfrytëzonin këto pika kufitare kanë vetëm një qëllim, të krijojnë tensione, të destabilizojnë Kosovën dhe gjithë rajonin tonë. Por, në të njëjtën kohë e tregojnë lidhmërinë e drejtpërdrejt ndërmjet shtetit serb dhe bandave kriminale që i kanë organizuar këto bllokada", ka thënë Osmani.

Presidentja Osmani i ka bërë thirrje bashkësisë ndërkombëtare që të dalë me qëndrim publik për shkeljet e vazhdueshme të Serbisë.

"I bëj thirrje aleatëve tanë që të dalin me qëndrim publik lidhur me këto shkelje të vazhdueshme nga ana e Serbisë, të cilat po shkelin të drejtat e qytetarëve tanë dhe kanë tendencë ta destabilizojnë paqen dhe sigurinë jo vetëm në Kosovë por në tërë rajonin tonë”, ka shtuar presidentja.

Pikat kufitare në Merdare dhe Bërnjak vazhdojnë të jenë të mbyllura, ndërsa në Jarinjë ka lëvizje të lirë të veturave, njofton Policia e Kosovës. Pas mbylljes së pesë zyrave të strukturave paralele në veri nga Policia e Kosovës nën dyshimin për falsifikim të dokumenteve, i ashtuquajturi “Këshilli serb i bllokadës” njoftoi bllokimin e pikave kufitare. mb/

Foto: MIA