Ankara, 11 nëntor 2025 (MIA) - Një aeroplan transportues ushtarak turk, C-130, që ka fluturuar nga Azerbajxhani drejt Turqisë, është rrëzuar sot në Gjeorgji, duke vrarë të gjithë 20 ushtarët në bord, njoftoi sot qeveria turke.

Avioni C-130 u nis nga Azerbajxhani dhe ishte duke u kthyer në Turqi kur u rrëzua, njoftoi Ministria turke e Mbrojtjes në rrjetin social X.

Video pamjet të transmetuara nga mediat tregojnë aeroplanin duke rënë në spirale, duke lënë gjurmë tymi të bardhë.

🇹🇷| Turkish military cargo plane C130 crashed near the Georgian-Azerbaijan border. pic.twitter.com/iWV8UYHm5L

— Eternal Glory (@EternalGlory0) November 11, 2025

Presidenti turk, Rexhep Taip Erdogan, deklaroi se është "thellësisht i trishtuar" dhe shprehu ngushëllime për të vrarët në aksident.

Presidenti i Azerbajxhanit, Ilham Aliev, gjithashtu i shprehu ngushëllime homologut të tij turk, Erdogan, për incidentin.

Në mesazhin e tij, Aliev shkroi: "Jemi thellësisht të prekur nga lajmi tragjik i humbjes së ushtarëve në rrëzimin e aeroplanit transportues ushtarak të Forcave Ajrore Turke që u ngrit nga Ganxha dhe u rrëzua në territorin gjeorgjian."

"Në këtë moment pikëllimi, ndaj dhimbjen tuaj dhe, në emrin tim dhe në emër të popullit të Azerbajxhanit, ju shpreh ngushëllimet e mia të sinqerta juve, familjeve dhe të dashurve të të ndjerëve, si dhe popullit vëllazëror të Turqisë", tha Aliev.

Ka filluar një operacion kërkim-shpëtimi në koordinim me autoritetet azerbajxhane dhe gjeorgjiane, thanë zyrtarët.

Ministria e Punëve të Brendshme të Gjeorgjisë njoftoi se aeroplani u rrëzua në komunën Signagi, pranë kufirit me Azerbajxhanin dhe se ka nisur një hetim. mb/

Foto: printskrin