Gaza, 12 qershor 2025 (MIA) - Mbi 100 persona janë vrarë në sulmet izraelite ndaj Gazës në 24 orët e fundit, ndërsa një sulm ndaj një pike për ndihmë humanitare dhe një ndërprerje e telekomunikacionit kanë thelluar krizën në territorin palestinez tashmë të shkatërruar, raporton DPA.

Ministria e Shëndetësisë në Gaza, e cila është nën kontrollin e Hamasit, ka bërë të ditur se 103 persona janë vrarë, si dhe 427 janë plagosur. Shifrat nuk specifikuan se sa prej tyre ishin civilë dhe sa ishin luftëtarë.

Që nga fillimi i luftës më 7 tetor 2023, e cila filloi me një sulm të Hamasit në Izraelin jugor në të cilin u vranë rreth 1.200 njerëz dhe mbi 250 u rrëmbyen, janë vrarë më shumë se 55.200 njerëz në Gaza, sipas të njëjtës ministri, ndërsa mbi 127.800 janë plagosur.

Burime palestineze akuzuan ushtrinë izraelite për hapjen e zjarrit ndaj pikave të ndihmës, ndërsa fondacioni GHF, i mbështetur nga Izraeli dhe SHBA-ja, raportoi se Hamasi kreu një sulm vdekjeprurës ndaj punonjësve të tij.

Autoriteti palestinez i telekomunikacionit njoftoi sot se rrjeti i fundit i fibrave optike në Gaza është shkatërrua në sulm, duke ndërprerë të gjitha lidhjet e internetit dhe telefonisë.

WAFA paralajmëroi për pasoja të rënda humanitare dhe bëri thirrje për rehabilitim urgjent të rrjetit. mb/