Prishtinë, 9 qershor 2025 (MIA) - Kryeministri në detyrë i Kosovës, Albin Kurti, ka zhvilluar sot një vizitë zyrtare në Komunën e Mitrovicës së Jugut, ku është takuar me kryetarin Bedri Hamza, ku kanë diskutuar për funksionimin e komunave dhe për forcimin e bashkëpunimit ndërmjet qeverisë dhe pushtetit lokal, la bërë të ditur zëdhënësi i Qeverisë në detyrë, Përparim Kryeziu.

Qëllimi i këtij bashkëpunimi, sipas tij, është realizimi i projekteve që ndikojnë drejtpërdrejt në jetën e qytetarëve.

"Pas vizitës dhe takimit me kryetarin e Komunës së Mitrovicës së Veriut, Erden Atiq, kryeministri Kurti ka vizituar sot edhe kryetarin e Komunës së Mitrovicës së Jugut, Bedri Hamza. Të dy takimet kanë pasur në qendër të diskutimit punën e këtyre komunave dhe bashkëpunimin ndërmjet qeverisë dhe komunave në realizimin e projekteve në shërbim të qytetarëve", deklaroi Kryeziu.

 Vizita në Mitrovicën e Jugut vjen në kuadër të angazhimeve të qeverisë për bashkëpunim me të gjitha komunat e Kosovës, pavarësisht përkatësisë politike të kryetarëve të tyre. mb/

Foto: MIA